एका ट्रिपची गोष्ट- आईचा जोगवा मागेन!
प्राची गोखले
काही दिवासांपूर्वी आमचं गाव ताम्हणमळ्यात ग्रामदेवतेची पालखी सोहळ्याची सुरुवात झाली. मानाई देवीच्या समोर सहाणेवर आमच्या मंडळाला भजनसेवा करण्याची संधी मिळाली. मांडवी एक्सप्रेसनं सर्वजणी मजा करत चिपळूणला पोहोचलो. पुढे गावात आलो. बारा जणांचा ग्रुप होता. प्रमोद जोशी, मोरेश्वर देवल, संतोष पिसाट आणि रुचीर असे उत्तम वादक आणि आमचा कांचन, संध्या, ज्योती, अनुपमा, शांता, वैशाली आठले, वैशाली खामबेटे आणि मी स्वतः असा ग्रुप गावातील घरी आलो.
माझ्या जाऊ माधुरी आणि तिच्या सुनांनी म्हणजेच मुग्धा आणि मधुरा यांनी आमची उत्तम सोय केली. फणसाची भाजी, पुरणपोळी गरम मसाला ही आमटी खाऊन सर्वजणी तृप्त झाल्या. संध्याकाळी घरी भजन करून रात्री आठ वाजता सहाणेवर पोहोचलो. मानाई देवीची साडीनं ओटी भरून आशीर्वाद घेतले. गणरायाला वंदन करून भजनाची सुरुवात केली. आमचं भजन बैठं नसून आम्ही अनेक सादरीकरणं करतो. 'शुभंकरोती म्हणा मुलांनो' असा संदेश देऊन दीप नृत्य करतो. छान दीपमाळ बनवतो. हे पाहून लोकांनी टाळ्यांचा कडकडाट केला. त्यानंतर टिपऱ्या आणि जोगवा असे नृत्य प्रकार सादर केले. वैशालीनं सादर केलेला जोगवा तर सर्वांना खूपच आवडला. उत्तम अभिनय आणि मनापासून केलेलं नृत्य पाहून प्रेक्षकांनी कौतुक केलं. राजचा गोंधळी भाग्यश्रीचा कृष्ण भाव खाऊन गेले. दुसऱ्या दिवशी सकाळी सर्वांना गाव दाखवलं. जोशी सरांनी सर्वांचे खूप फोटो काढले. हॉर्नबिल हा देखणा पक्षी त्यांच्यामुळे आम्हाला पाहायला मिळाला. अशा प्रकारे लोकांचं मनोरंजन करण्याची माझी इच्छा देवीनंच पुरी केली.