दुर्गभ्रमंती- माहुली गड

>> प्रथमेश तेंडुलकर

शिवाजी महाराज आणि त्यांचे गड याबद्दल नितांत आदर आणि कुतूहल होतं आणि त्यातूनच ठरवलं की ट्रेकला जायचं. मग शोध सुरु झाला आणि गड ठरला तो म्हणजे माहुली गड. मुंबई जवळच आसनगाव या स्टेशनपासून हा गड जवळ आहे. आम्ही ३ मित्र निघालो आणि प्रवास सुरु झाला. ठरवल्यानुसार सकळी प्रवासाला सुरुवात केली. आसनगाव स्टेशनला पोहोचल्यानंतर साधारण ४० मिनिटांनी आम्ही माहुली गावी पोहोचलो. ट्रेकला सुरुवात केली. आजुबाजूला घनदाट जंगल, पक्षांचे आवाज आणि शांतता. इतक शांतता की स्वतःच्या पावलांचा आवाज ऐकू येत होता.

दिशादर्शकाच्या मदतीने आम्ही चालत राहिलो. तिथून पुढच्या दीड तासात आम्ही गडावर पोहोचलो. म्हणजे एकूण अडीच तास लागले गडावर पोहोचायला. गडावर पोहोचल्यावर आम्ही गडावरून खाली दिसणारे निसर्गसौंदर्य बघत बसलो. एक तास भर गडावर थांबून परतीचा प्रवास लागलो. चढण चढण्यापेक्षा उतरण जास्त कठीण होतं. अरुंद वाटा, एकाबाजूला मोठे खडक आणि दुसऱ्याबाजूला दरी, खोल दरी. भरीस भर म्हणून पडणारा पाऊस त्या वाटा निसरड्या करत होता. जर तोल गेला तर गडाच्या माथ्यावरून थेट पायथ्याला जाण्याचा शॉर्टकट होता तो. तरी एकमेकांना मदत करत पुढच्या दोन तासात आम्ही गडावरून खाली आलो. तरी गडावरून खाली येताना पुन्हा मागे वळून गडाकडे पाहिलं. आपलं घर सोडून बाहेर जाताना जसं वाटतं तसं वाटत होतं. महाराजांना स्मरून आम्ही गडाला निरोप दिला.

अशाप्रकारे माझा पहिला ट्रेक पूर्ण झाला. या ट्रेकने मला खूप काही गोष्टी शिकवल्या. समोर असलेल्या संकटांवर मात करत आणि कितीही विश्वास डगमगला तरी ठरलेला निश्चय पूर्ण करण्यासाठी आम्ही केलेली यशस्वी मेहनत हेच शिकवते की, आयुष्यात असे अनेक प्रसंग येतात. पण न डगमगता विश्वासाने त्याला सामोरं जायचं असतं आणि संकटांवर मात करायची. असा हा माझ्या आयुष्यातील पहिला मोठा ट्रेक मला खूप काही शिकवून गेला.