युरोप भटकंतीची स्वप्नपूर्ती

सरला संखे, बोईसर
आपल्या देशातली बरीच शहरं बघून झाल्यावर माझं एक स्वप्नं होतं. जीवनात एकदा तरी युरोप टूर करावी. माझे यजमान निवृत्त झाल्यावर दोन महिन्यांच्या आत पासपोर्ट मिळाला. काही दिवसांनी एका नामांकित ट्रॅव्हल्स कंपनीद्वारे १३ दिवसांची युरोप टूर बुक झाली. आमचा ४९ जणांचा विमानाने प्रवास सुरु झाला. विमानामध्ये आपल्या आवडीनुसार खाणं-पिण्याची सोय होती. मी माझ्या सीटसमोरच्या टीव्ही स्क्रीनवर सिनेमा बघत होते. बाजूला माझ्या यजमानांचं प्राणायम चालू होतं. असं सर्व चालू असताना पॅरिस शहर कधी आलं ते कळलंसुद्धा नाही.
संध्याकाळी पॅरिस शहरामध्ये फिरताना मला इव्हिनिंग इन पॅरिस हा शम्मी कपूर यांचा सिनेमा आठवला. तसंच जगातल्या प्रसिद्ध आयफेल टॉवरवर जाऊन खूप मज्जा आली. तसंच रात्री पॅरिस नाईट शो बघून आमच्या ग्रूपने भरपूर मज्जा केली. प्रवास करताना रस्त्याच्या दोन्ही बाजूला हिरवाई आणि डोळ्याला सुखावणारे सृष्टी सौंदर्य पाहून भारावून गेलो. रस्त्याच्या दुर्तफा पवन चक्की, हिरवळ हे सर्व बघायला मिळालम. जगामधील प्रसिद्ध रोम शहर पाहून तेथील प्रसिद्ध पिझ्झा- बर्गरचा स्वाद घेतला. आम्ही सर्वजण एकत्र कुटुंबासारखे राहिलो. अशाप्रकारे मोठ्या आनंदात, उत्साहात आमची युरोप टूर पार पडली.