​ चटका लावून गेली

स्मिता गवळी, बोरिवली

मला दोन्ही मुलगेच. जेव्हा माझ्या भावाला पहिली मुलगी झाली तेव्हा इतरांपेक्षा जास्त मला व माझ्या यजमानांना आनंद झाला. तिचं सेजल हे नाव मीच ठेवलं. माझ्या यजमानांनी तिला अगदी स्वत:ची मुलगी असल्यासारखा जीव लावला. दिसायला अतिशय सुंदर, गोंडस आणि हुशार होती. चित्रकला, मेहंदी, नृत्य, फोटोग्राफी आणि हॉकी अशा सर्वांमध्ये निपुण असलेली सेजल तिच्या कुटुंबीयांबरोबरच माझ्या कुटुंबातही अतिशय लाडकी होती. २५ सप्टेंबर, २०१६ रोजी तिला अचानक ताप येऊन उलट्या होऊ लागल्या. त्याकरिता माझ्या भावाने तिला नायर रुग्णालयात नेलं. तिथं तिला तात्पुरते उपचार करुन रक्ताची तपासणी करण्यात आली. रक्त तपासणीनंतर तिचं हिमोग्लोबीन ४.०० असल्याचं समजलं.
हॉस्पिटलमध्ये विविध आजाराचे रुग्ण असल्यामुळे तिला रुग्णालयात दाखल न करता तात्पुरते उपचार करुन पाठवण्यात येत असे. २ ऑक्टोबर, २०१६ रोजी तिच्या रक्ताच्या चाचण्यांमध्ये डेंग्यू, मलेरिया, टायफॉइड, लेप्टो, इ. ची चाचणी केली असता त्यात काहीही आढळलं नाही. त्यावेळी माझ्या भावाने माझ्या यजमानांना याची सर्व कल्पना दिली. तेव्हा माझ्या पतींनी आमच्या फॅमिली डॉक्टरांशी चर्चा करुन तिला बोरिवलीला घेऊन या. आपण घरीच उपचार करु असं सुचवलं.
माझ्या भावाने तिला दुपारी डॉक्टरांच्या क्लिनिकमध्ये आणलं. आम्ही तिला पाहिलं तेव्हा आम्हीही हादरुन गेलो होतो. डॉक्टरांनी विविध पर्याय आमच्यासमोर ठेवले. त्यात आम्ही इंजेक्शनद्वारे हिमोग्लोबीन वाढवण्याचा पर्याय निवडला. तिला घरी आणल्यानंतर घरी येऊन सलाईन व इंजेक्शन सुरु केलं. त्या संध्याकाळी तिचा ताप कमी होऊन उलट्या होणंही थांबलं. हे सर्व ऐन नवरात्रीमध्ये झालं होतं. 'उद्याचं इंजेक्शन घेतलं की, दांडीया खेळायला जायचं', असं माझे पती तिला सांगत होते. त्या दिवशी ती सर्वांशी मस्ती करत होती. त्यामुळे आम्हालाही हायसं वाटलं.
दुसऱ्या दिवशी ६ ऑक्टोबरला माझा वाढदिवस असतो. त्या दिवशी तिची तब्बेत अधिकच खालावली. डॉक्टरांच्या सल्ल्याने माझ्या भावाने व दिराने तिला डॉक्टरांच्या गाडीतूनच हॉस्पिटलला नेलं. ताबडतोब तिला आयसीयूमध्ये दाखल करण्यात आलं. डॉक्टरांनी तिच्या सर्व प्रकारच्या टेस्ट केल्यानंतर तिला लॅप्टो झाला हे फार उशीरा समजलं. तोपर्यंत तिचे सर्व अवयव निकामी झाले होते. १० ऑक्टोबरला पहाटे ४ वाजता अवघ्या १९ वर्षांची सेजल आम्हाला सोडून गेली. सेजल आमच्यातून गेली त्याला एक वर्षं झाली. तिच्या स्मृतीस अभिवादन!