​ एक अविस्मरणीय दिवस

अक्षदा वागळ-चोणकर
मी दहिसर येथील पूर्णप्रज्ञा मराठी माध्यम या शाळेत शि​क्षिका होते. जवळ-जवळ १५ ते १६ वर्षं आमच्या शाळेतील कोणत्याही शिक्षकांचा संपर्क किंवा कोणाची भेट झाली नाही. कारण पूर्वी सर्वांकडे दूरध्वनी होते. त्याच्या जागी मोबाईल आले. त्यामुळे ते नंबरसुद्धा मिळू शकले नाहीत. आमच्या मनातील ही इच्छा आमच्या सर्व माजी विद्यार्थ्यांनी पूर्ण केली. पूर्णप्रज्ञा मराठी माध्यमाच्या सर्व विद्यार्थ्यांनी एकत्र येऊन बालवाडी ते दहावीपर्यंत १७ जानेवारी २०१६ रोजी सर्व शिक्षकांसह शिक्षकेतर कर्मचारी यांना आमंत्रण पाठवण्यात आली. एक मोठं स्नेहसंम्मेलनाचं आयोजन केलं होतं. आम्हा सर्वजणांना दहिसर येथील डी. एस. एस. सभागृह दहिसर येथे दिवसभरासाठी एकत्र आणलं. त्यावेळी सर्व शिक्षकांच्या चेहऱ्यावर एक वेगळा आनंद झळकताना दिसत होता. सभागृहात कार्यक्रमाला सुरुवात करण्यासाठी विद्यार्थ्यांनी आम्हाला सभागृहात पाचारण केलं. त्यावेळी सर्व शिक्षकांच्या डोळ्यात आनंदाश्रूनीं गर्दी केली. जो क्षण पूर्वी कधी आम्हाला अनुभवता आला नव्हता तो आमच्या माजी विद्यार्थ्यांनी आम्हाला दिला. त्यानंतर कार्यक्रमाच्या वेळी प्रत्येक शिक्षक आणि शिक्षकेतर कर्मचारी यांना रंगमंचावर नेऊन यथोच्चित सत्कार आणि सन्मान केला. तो क्षण मी आयुष्यात केव्हाही विसरू शकणार नाही. एवढा मोठा कार्यक्रम विद्यार्थ्यांनी स्वतःच्या बौद्धिक, शारीरिक आणि आर्थिक बळावर पार पाडल्याबद्दल सर्व शिक्षकांच्यावतीने विद्यार्थ्यांचं कौतुक करावं तेवढं थोडंच.