गजरे साहेबांचे आभार

सुभाष डिगसकर, दहिसर

पदवी परीक्षा उत्तीर्ण झाल्यावर १९७३ मध्ये मी कामगार आयुक्त कार्यालय, ताडदेव मुंबई इथे कामगार अन्वेषक या पदावर नियुक्त झालो. या पदावर कार्यरत असताना डिसेंबर १९८६मध्ये कार्यालयीन आदेशानुसार काही कर्मचाऱ्यांची पदोन्नती सरकारी कामगार अधिकारी या पदावर करण्यात आली. ती सहा महिन्याच्या तात्पुरत्या कालावधीसाठी होती. मलाही पदोन्नती देऊन माझी बदली कामगार उपायुक्त विभागीय कार्यालय, नाशिक इथे करण्यात आली.

या कालावधीमध्ये मनोहर गजरे हे कामगार उपायुक्त या पदावर कार्यालय प्रमुख म्हणून नाशिक विभागीय कार्यालयात कार्यरत होते. ते मुंबईच्या कामगार आयुक्त कार्यालयात आले असताना त्यांनी मला बोलावून घेतलं आणि कार्यालयीन आदेशानुसार नाशिक कार्यालयात रुजू न झाल्याबद्दल विचारलं? मी म्हटलं, माझं कुटुंब मुंबईत आहे. मुलं लहान आहेत. फक्त सहा महिन्यांसाठीच ही पदोन्नती असेल. शिवाय मला नाशिकला राहण्याची सोयही नाही. तेव्हा ते मला म्हणाले, जरी तुमची नियुक्ती तात्पुरती असली तरी तुम्हाला अधिकारी पदावर काम केल्याचे समाधान मिळेल. त्यांनी माझ्या राहण्याच्या सोयीसाठी मदत करायचं आणि मुंबईला जाण्या येण्यासाठी कार्यालयीन वेळेत सवलत देण्याचं आश्वासन दिलं. माझे उच्चपदस्थ असूनही त्यांनी आपुलकीच्या आणि वडील बंधूंच्या नात्याने माझी समजूत घातली. मलाही ते पटलं आणि मी जानेवारी १९८७ मध्ये नाशिकला अधिकारी पदावर रुजू झालो. दरम्यानच्या कालावधीमध्ये पदोन्नती झालेल्या अधिकाऱ्यांनी तात्पुरत्या नेमणुकीच्या कार्यालयीन आदेशाविरुद्ध उच्च न्यायालयात याचिका सादर केली. उच्च न्यायालयाने तात्पुरती नेमणूक केलेल्या सर्व अधिकाऱ्यांना कायम स्वरूपी सेवेत घेण्याचे आदेश दिले. मी सेवानिवृत्त होईपर्यंत सरकारी कामगार अधिकारी या पदावर कार्यरत राहिलो. हे सगळं होऊ शकलं गजरे साहेबांमुळे. त्यांच्या समजावण्यामुळेच मी नाशिकला रुजू झालो त्याचमुळे पुढे कायमही होऊ शकलो. सहकाऱ्यांच्या समस्यांकडे माणुसकीच्या दृष्टीकोनातून पाहण्याचा धडा मला गजरे साहेबांनी दिला. पुढे तसं वागण्याचा सतत प्रयत्नही केला. माझ्या पदोन्नतीच्या कालावधीमध्ये गजरे साहेबांनी मला केलेल्या मदतीबद्दल मी कृतज्ञतापूर्वक त्यांचे आभार मानतो आहे. ही संधी दिल्याबद्दल मटाचेही धन्यवाद !