\Bसूरश्री केसरबाईंचा सत्कार
मुंबई -\B पद्मभूषण व राज्यगायिका असा बहुमान मिळाल्याबद्दल सूरश्री केसरबाई केरकर यांचा आज रात्री साहित्य संघांमध्ये गोमंतक मराठा समाजातर्फे सत्कार करण्यात आला. या सत्काराला उत्तर न देता सहकार्याबद्दल त्यांनी कृतज्ञता व्यक्त केली. अध्यक्षीय भाषणात सुशील कोळेकर म्हणाले, 'भीमाची भूक अनावर होती, कितीही खाल्ले तरी त्याची तृप्ती होत नसे. पण कुंतीच्या हातचा एक लाडू खाल्ला की तो तृप्त होई. तसेच, सूरश्री केसरबाई यांचे पुष्कळ बहुमान, सत्कार झाले. यापुढेही होतील. पण आमचा सत्कार म्हणजे कुंतीच्या हातचा लाडू आहे. त्याने त्यांची तृप्ती होईल, अशी माझी खात्री आहे. आज भेसळीचे युग आहे. त्याचे लोण संगीतापर्यंत पोचले आहे. शुद्ध खानदानी अभिजात संगीत ऐकू येणे दुर्मिळ झाले आहे. संगीतात भेसळ होऊ नये, म्हणून केसरबाईंनी खूप मेहनत आणि साधना केली. म्हणूनच गायनदेवतेचा प्रत्यक्ष साक्षात्कार म्हणजे केसरबाई असे म्हणता येईल.'
\Bकलकत्ता कसोटीत लष्कर
कलकत्ता -\B ऑस्ट्रेलिया व भारत या दरम्यान कलकत्ता येथे होणाऱ्या चौथ्या कसोटी सामन्यात पश्चिम बंगाल सरकार बंदोबस्ताकरिता लष्कराला सज्ज राहण्याविषयी विनंती करील, असा अंदाज आहे. पाच दिवसांच्या या सामन्यासाठी ईडन गार्डन्सवरील बैठकीच्या संख्येपेक्षा कितीतरी अधिक संख्येने तिकिटाची मागणी दिसली आहे. १९६७ सालचा वेस्ट इंडीज व भारत यांमधील कसोटी सामना क्रिकेट प्रेक्षकांच्या दंगलीमुळे सोडून द्यावा लागला होता.
\Bबेकारीचा प्रश्न
नागपूर - \Bमूलभूत आर्थिक परिवर्तनाशिवाय देशातील बेकारीचा बिकट प्रश्न कदापि सुटणार नाही, असे उद्गार राष्ट्रवादी संयुक्त समाजवादी पक्षाचे नेते खासदार मधू लिमये यांनी आज येथे भाषण करताना काढले.
(९ डिसेंबर, १९६९च्या अंकातून)