१ फेब्रुवारी १९६८

सायगावमध्ये लढाई

सायगाव - सबंध दक्षिण व्हिएतनाममध्ये आज घनघोर लढाई झाली. लढाईचे लोण खुद्द राजधानी सायगाव येथेही पोचले होते. व्हिएतनाम गनिमांनी काही काळ तर अमेरिकन वकिलातीचाही कब्जा घेतला. अखेर द. व्हिएतनामचे अध्यक्ष एन्ग्युयेन थिऊ यांनी देशभर लष्करी कायदा जारी केला. गेल्या ४८ तासांत व्हिएतनामच्या गनिमांनी सामर्थ्याचे जे अपूर्व प्रदर्शन केले, त्यामुळे झालेल्या युद्धात एक हजार ७८८ गनिमांना कंठस्नान घालण्यात आले, असे अमेरिकन प्रवक्त्याने सांगितले.

नव्या धर्तीच्या शाळा

पणजी - मुलांच्या मानसिक व शारीरिक वाढीला पोषक अशा शाळा बांधण्यास गोवा सरकार लवकरच सुरुवात करणार आहे. या शाळांच्या बांधणीसही कमी खर्च येईल. यासंबंधी शिक्षणमंत्री गोपाळराव मयेकर यांनी काल येथे सांगितले की रुरकीच्या सेंट्रल बिल्डींग रिसर्च इन्स्टिट्यूटमधील तंत्रज्ञ व गोव्यातील बांधकाम व शिक्षण खात्यातील अधिकारी यांनी गोव्याची भौगोलिक रचना व हवामान लक्षात घेऊन प्राथमिक शाळा बांधण्याचा आराखडा तयार केला आहे. या शाळांची इमारत चार खोल्यांची असेल.

उपमा शिकवावी की शिजवावी?

बारामती - बारामती तालुक्यातील ५० च्या वर प्राथमिक शाळातून केअर योजनेनुसार एक जानेवारीपासून दुपारच्या सुट्टीत विद्यार्थ्यांना अल्पोपहार देण्यासाठी उपमा किंवा उप्पीट बनवण्याचे साहित्य देण्यात येत आहे. बीडीओच्या आदेशानुसार हे वाटप होते. पण गंमत अशी की उपमा शिक्षकांनाच तयार करण्यात सांगण्यात आले आहे. त्यामुळे त्यांचा बराचसा वेळ शिकविण्याऐवजी शिजविण्यातच जातो. त्यामुळे हे पदार्थ करण्यासाठी आचारी पुरवा, आम्ही वाटल्यास वाटप करू अशी त्यांची मागणी आहे.

जलवंतीचे वरदान

मुंबई - विहिरीतून पाणी उपसून शेताला पुरविण्यासाठी लागणाऱ्या डिझेल किंवा वीज यांच्या खर्चात ७० टक्के कपात करणाऱ्या एका टाकीचा शोध सुप्रसिद्ध संशोधक गोविंदराव साठे यांनी लावला आहे. या टाकीचे मोठ्या प्रमाणात उत्पादन सुरू झाले असून तिचे नाव 'जलवंती' असे ठेवण्यात आले आहे. जलवंती टाकीची रचना अत्यंत सोपी असल्याचे संशोधक साठे यांनी सांगितले.