१० जुलै १९६७

फातिमा जिना कालवश
कराची - पाकिस्तानचे संस्थापक पैगंबरवासी महंमद अली जिना यांच्या भगिनी कुमारी फातिमा जिना आज झोपेतच, हृदयविकाराच्या झटक्याने निधन पावल्याचे जाहीर करण्यात आले. त्या ७४ वर्षांच्या होत्या. पाकिस्तानच्या निर्मितीसाठी त्या जिनांच्या बरोबरीने लढल्या. पाकिस्तानच्या मार्च १९६५ च्या अध्यक्षीय निवडणुकीत त्यांनी अध्यक्ष अयुबखान यांच्याशी सामना दिला. पण त्या अयशस्वी ठरल्या. त्यानंतर त्या निवृत्तीचे आयुष्य जगत होत्या. त्यांचा जन्म कराचीचा असला तरी त्यांचे शिक्षण मुंबई व कराची येथे झाले.

काँग्रेस-मगो विलीनीकरण?
पणजी - महाराष्ट्रवादी गोमंतक पक्ष काँग्रेसमध्ये विलीन करण्यासाठी गोव्याचे मुख्यमंत्री दयानंद बांदोडकर यांनी दोन अटी घातल्या आहेत. पहिली अट अशी की पुरुषोत्तम काकोडकर यांच्या नेतृत्वाखालील गोवे प्रदेश काँग्रेस ताबडतोब बरखास्त करण्यात यावी आणि सात जणांची एक हंगामी कमिटी नेमावी. यापैकी निदान पाच सभासद मगो पक्षाचे असावेत. दुसरी अट अशी की काँग्रेसने गोव्याच्या भवितव्यासंबंधी आपली भूमिका स्पष्ट करावी.

हापूस आंबा निर्यात
नवी दिल्ली - बलसाडचा आंबा यंदा ब्रिटन व इतर युरोपियन राष्ट्रात पाठविण्यात आला. जहाजांनी हा पाठविण्यात आला. स्टेट ट्रेडिंग कॉर्पोरेशनने या हंगामात आंबे प्रयोगादाखल व्यापारासाठी पाठविले होते. गुजरातमधील आंबराईतील हे आंबे अगदी ताजे ताजे तेथील लोकांना खावयास सापडले. परदेशी पाठविलेल्या आंब्यात सुप्रसिद्ध हापूसही होता.

नौशिर भरूचा निधन
मुंबई - प्रजासमाजवादी नेते व माजी खासदार नौशीर भरुचा हे पोटातील पँक्रिया गाठीला सूज आल्यामुळे आज दुपारी येथे निधन पावले. ते ५९ वर्षांचे होते. ते प्रख्यात कायदेपंडित होते. त्यांची विधानसभेतील आणि लोकसभेतील भाषणे अभ्यासपूर्ण असत.

बेकारीचे आव्हान
मुंबई - मोटार निर्मिती धंद्यातील वीस हजार कामगारांवर अलेली बेकारीची लाट थांबविण्यासाठी महाराष्ट्र सरकारने पुढे आले पाहिजे असे आवाहन इंजिनियरिंग मजदूर सभेचे अध्यक्ष आर. जे. मेहता यांनी केले आहे.