१२ ऑक्टोबर १९६८

अपोलोचे यशस्वी उड्डाण

केप केनेडी

चंद्राकडे मानवासह पाठवावयाच्या अंतराळयानाची रंगीत तालीम म्हणून सॅटर्न १ बी या प्रचंड अग्नीबाणाच्या सहाय्याने, तीन अमेरिकी अंतराळवीर असलेले अपोलो ७ हे यान आज येथून उडविण्यात आले. पृथ्वीच्या कक्षेत त्याने व्यवस्थितपणे भ्रमण करण्यास प्रारंभही केला आहे.

सकाळी ठीक ११ वाजून ३ मिनिटांनी या पांढऱ्याशुभ्र अग्निबाणाने आकाशाकडे झेप घेतली. त्यावेळी त्याच्या शेपटातून कानठळ्या बसवणारा गडगडाट करीत केशरी ज्वाळा निघाल्या. सूर्यप्रकाशात लखलखणारा हा अग्निबाण बघता बघता दूर निघून गेला. त्यानंतर दहाच मिनिटांत तो पृथ्वीच्या कक्षेत फिरायला लागला.

तुकडोजींचे देहावसान

अमरावती

संत तुकडोजी महाराज यांचे मोझरी येथील गुरुकुंज आश्रमात आज सायंकाळी पाच वाजता देहावसान झाले. त्यांचे वय ५९ होते. ते कर्करोगाने आजारी होते. महसूलमंत्री बाळासाहेब देसाई, माजी मंत्री डॉ. कैलास, प्रशासकीय अधिकारी, आश्रमातील मंडळी मृत्यूसमयी त्यांच्याजवळ होती.

माझा मठ नाही किंवा मी मठाधिपती नाही. माझा बुवाबाजीला सतत विरोध होता व आहे. दरवर्षी माझ्या मृत्यूदिनी सर्वधर्मियांनी एकत्र येऊन पंचवटी वृक्षाखाली सामुदायिक प्रार्थना करावी. गांधींजींच्या ग्रामोद्धराचा मी सतत पुरसकार केला. जनता हाच माझा जनार्दन आहे, हा त्यांचा संदेश त्यांनी शस्त्रक्रियेपूर्वी काही दिवस आधी कळविला होता.

सह्याद्रीतून रेल्वे

मुंबई

पुणे आणि नासिक येथे जावयास लागणाऱ्या धळ आणि बोर घाटाप्रमाणे सह्याद्री फोडून आणखी एक रूळमार्ग टाकण्यासाठी चौथ्या योजनेत पहाणी हाती घेण्यात यावी अशी शिफारस केली असल्याचे विश्वसनीयरित्या समजते. पाचव्या योजनेपर्यंत असा नवा रूळ मार्ग झाला नाही, तर मध्य रेल्वेची वाहतूक यंत्रणा मुंबईहून होणाऱ्या वाढत्या वाहतुकीस पुरी पडणार नाही, असा इशाराही अहवालात देण्यात आला आहे.