१६ जून १९६७

करवाढीचा अर्थसंकल्प

मुंबई - चार कोटी ७५ लाख रुपयांचे नवे कर असलेला अर्थसंकल्प अर्थमंत्री शेषराव वानखेडे यांनी आज महाराष्ट्र विधानसभेस सादर केला. चैनीच्या वस्तूंवरील विक्रीकरात वाढ, मालवाहतूक करणाऱ्या मोटारींवरील करात वाढ, करमणुकीच्या करात वाढ, सिनेमागृहातील जाहिरातींवर नवा कर आदी नवी करवाढ अर्थमंत्र्यांनी सुचविली आहे.

धोरणात बदल नाही

नवी दिल्ली - जागतिक बँकेच्या दडपणामुळे भारत सरकारने आपल्या आर्थिक धोरणात बदल करण्याचा प्रश्नच नाही, असे अर्थमंत्री मोरारजी देसाई यांनी आज लोकसभेत सांगितले. सरकार आपल्या स्वतःच्या विचारानेच वागते, असेही त्यांनी सांगितले. आज लोकसभेत अनेक काँग्रेसी व विरोधी सदस्यांनी जागतिक बँकेच्या स्वेल कमिशनचा अहवाल लोकसभेला सादर करावा, अशी मागणी केली. या प्रश्नावर अनेक सदस्य प्रक्षुब्ध झाले. पण हा अहवाल लोकसभेसमोर ठेता येणार नाही, असे अर्थमंत्र्यांनी स्पष्ट सांगितले. तरीही सदस्यांचे समाधान झाले नाही.

दुभंगलेले दुवे

पुणे - भारतातील दुभंगलेलल्या समाजवादी चळवळीचे प्रवाह पुन्हा एक होण्याची शक्यता फार दूर नाही, असा आशावाद प्रजासमाजवादी पक्षाचे अध्यक्ष नानासाहेब गोरे यांनी आज सायंकाळी टिळक स्मारक मंदिरात त्यांच्या षष्ट्यब्दीनिमित्त झालेल्या अनौपचारिक मेळाव्यात व्यक्त केला.

आरोपांचा इन्कार

नवी दिल्ली - गेल्या सार्वत्रिक निवडणुकीचे वेळी अमेरिकेच्या गुप्तहेर खात्याकडून आर्थिक मदत मिळाली या ‘न्यूयॉर्क टाइम्स’मधील आरोपाचा स्वतंत्र, जनसंघ व प्रजा समाजवादी पक्ष यांनी इन्कार केला. जनसंघाचे नेते बलराज मधोक यांनी अर्थसंकल्पावरील चर्चेत लोकसभेत या आरोपांचा इन्कार करून सांगितले की जनसंघाने कोणत्याही परकीय देशाकडून एक दमडीही घेतलेली नाही. जनसंघ अमेरिकेचा किंवा रशियाचा वा दुसऱ्या कोणत्याही देशाचा हस्तक नाही.

संकरित बियाणे

नासिक - येत्या खरीप हंगामात संकरित बियाण्यांबाबत महाराष्ट्र स्वयंपूर्ण बनविण्याचा निर्णय घेतल्याचे शेती संचालक व्ही. जी. वैद्य यांनी येथे सांगितले. नासिक जिल्ह्यातील संकरित बियाणे वापरणाऱ्या शेतकऱ्यांच्या एका परिसंवादात ते बोलत होते.