१७ नोव्हेंबर १९६७

बँक राष्ट्रीयीकरण अहवाल

नवी दिल्ली - भारतातील विविध उद्योगधंद्यांना योग्य प्रमाणात व योग्य स्वरूपात आर्थिक साह्य वा कर्जे देता यावीत यासाठी बँकांचे राष्ट्रीयीकरण करण्याची शिफारस डॉ. आर. के. हजारी यांनी नियोजन मंडळाला सादर केलेल्या अहवालात केली आहे. हजारी यांनी नियोजन मंडळाला सादर केला. भारताचे औद्योगिक विकास खात्याचे मंत्री फक्रुद्दीन अली अहमद यांनी हा अहवाल आज लोकसभेपुढे ठेवला.

काँग्रेस अध्यक्ष

नवी दिल्ली - काँग्रेस अध्यक्षपदासाठी आपण पुन्हा उभे राहू इच्छित नाही, असे कामराज यांनी आज कार्यकारिणीच्या बैठकीत स्पष्ट सांगितले. मात्र नवा अध्यक्ष एकमताने निवडला जावा. निवडणूक झाल्यास पक्षाचे अपरिमित नुकसान होईल, असेही ते म्हणाले. शेवटी कामराज व इंदिरा गांधी यांनी येत्या काही दिवसांत काँग्रेस अध्यक्षाची एकमताने निवड होईल, यासाठी प्रयत्न करावेत असे ठरले.

'गेस्टॅपो' प्रमुख सापडला

पश्चिम बर्लिन - हिटलरच्या कुप्रसिद्ध व भयानक गॅस्टेपो दलाचा प्रमुख आणि फरारी असलेला युद्धकैदी हाईनरिश मुलर याला पनामा शहरात अटक करण्यात आल्याचे येथे जाहीर करण्यात आले. मुलरच्या हाताखाली अॅडोल्फ आईशमन काम करीत होता. या आइशमनलाच १९६२ मध्ये इस्रायलने ६० लक्ष ज्यूंच्या कत्तलीबद्दल फाशी दिले होते.

कारवार भागात निषेध

कारवार - डॉ. सुनीतिकुमार चतर्जी यांच्यासारख्या निःपक्षपाती भाषातज्ज्ञाचे मत डावलून म्हैसूरच्या राजकवीचे वा लेखकाचे मत ग्राह्य मानावे हे अजब आहे. तसेच मानवी एकात्मतेपेक्षा अरण्य एकात्मतेला त्यांनी खानापूरच्या दक्षिणेकडील भागाबाबत प्राधान्य द्यावे हे जंगली मानावे की क्रूर मानावे असे कळत नाही, असे मत सदाशिवगड येथे भरलेल्या महाराष्ट्र एकीकरण समितीच्या कार्यकर्त्यांच्या सभेत नुकतेच व्यक्त झाले. त्यानंतर अनेकांची अहवालाच्या निषेधपर भाषणे झाली.

कोकणी भाषा विधेयक

नवी दिल्ली - कोकणीस एक निराळी भाषा म्हणून मान्यता मिळावी म्हणून गोव्यातील खासदार सिकेरा यांनी आज लोकसभेत बिनसरकारी घटनादुरुस्ती विधेयक मांडले. नेपाळी भाषेसही घटनेत स्थान मिळावे म्हणून एक दुसरे विधेयक मांडण्यात आले आहे.