१७ सप्टेंबर १९६६

विदर्भ बंद अयशस्वी

नागपूर -

विदर्भ बंद आवाहनास विदर्भातील कामगारांकडून बिलकुल प्रतिसाद मिळाला नसल्याने तो फसला, असे संपूर्ण विदर्भातून आलेल्या बातम्यांनी दिसते, असे कामगारमंत्री नरेंद्र तिडके यांनी येथे सांगितले. ते म्हणाले की या बंद प्रकरणाला पायबंद असला पाहिजे, या बाजूने कामगारांनी कौल दिला. तिडके यांनी ‘बंद’चे चित्र पत्रकारांपुढे उभे केले. ते म्हणाले, की आज सकाळी ११पर्यंत नागपूर विभागातील कारखान्यांत ८० टक्के कामगार उपस्थित होते. अन्यत्र ९५ टक्के उपस्थिती होती.

क्रमिक पुस्तकांसाठी…

नागपूर -

शालेय ​क्रमिक पुस्तकांसाठी स्वायत्त ब्युरो शक्य तितक्या लवकर स्थापू, असे विधानसभेत शिक्षणमंत्री मधुकरराव चौधरी यांनी सांगितले. त्यांनी सांगितले की सरकारने मुंबई येथील इन्स्टिट्युट ऑफ सायन्सची पुनर्रचना करण्यासाठी चार सभासदांची समिती नेमली आहे. तिने अहवाल दिलेला नाही.

पुण्यात ४५० गणेशोत्सव

पुणे -

सार्वजनिक गणेशोत्सवांच्या संख्येने यंदा विक्रम केला. पोलिस कमिशनर वामनराव पाटील म्हणाले की, सार्वजनिक गणपती प्रतिष्ठापनेसाठी ४५० मंडळांचे अर्ज आले आहेत. उद्या आणखी अर्ज येतील. एवढी मोठी संख्या याआधी केव्हाच नव्हती.