२० जानेवारी १९६७

गोमंतकही केंद्रशासित

पणजी - गोव्यातील जनतेने, आपला प्रदेश केंद्रशासित ठेवण्याच्या बाजूने कौल दिला आहे. गोवे महाराष्ट्रात विलीन व्हावे अशी मागणी करणारांपेक्षा गोवे केंद्रशासित रहावे या बाजूने ३४ ह​जार २१ मते जास्त पडली. गोव्याच्या भावी दर्जाबद्दल जनतेच्या इच्छा अजमावण्यासाठी सोमवारी घेण्यात आलेल्या जनमत कौलात केंद्र शासनाच्या बाजूने १ लाख ७२ हजार १९१ मतदान झाले तर महाराष्ट्रात गोवा विलीन करण्याच्या बाजूने १ लाख ३८ हजार १७० मते पडली. विलीनीकरणवाद्यांचा पराभव अटळ आहे, ही गोष्ट काल रात्री २४ मतदारसंघांतील मतमोजणी पूर्ण झाल्यावर स्पष्ट झाली. परंतु, विलीनकरण विरोधकांनी जितक्या मतांनी हा विजय मिळविला, त्याची त्यांच्या पाठीराख्यांनाही अपेक्षा नव्हती.

आता लढा कोकणसाठी

पणजी - यापुढे आम्ही गोवा राज्यासाठी भांडणार आणि ते मिळविल्यानंतर कोकण राज्यासाठी झगडणार असे युनायटेड गोवन्स पक्षाचे अध्यक्ष डॉ. जॅक सिकेरा यांनी आज येथे सांगितले. दरम्यान, गोवे केंद्रशासित ठेवण्याच्या बाजूने जनतेने कौल दिला आहे असे अधिकृतरीत्या जाहीर झाल्यावर थोड्याच वेळात सबंध गोवे प्रदेशात १४४ कलम जारी करण्यात आले. हा हुकूम सात दिवस अमलात राहणार आहे.

अफवेने दगडफेक

हैदराबाद - गोहत्याबंदीसाठी गेले ६१ दिवस उपोषण करीत असलेले पुरीचे शंकराचार्य हे आज सकाळी पुरी येथे निधन पावल्याची अफवा शहरांत पसरल्यामुळे हैदराबाद व सिकंदराबाद या जोड शहरांत हरताळ पाळण्यात येऊन दगडफेकही झाली. चारमिनार येथे जमलेल्या सुमारे पाचशेच्या जमावाने बंदीहुकूम मोडून मिरवणूक काढण्याचा प्रयत्न केला. तेव्हा, पोलिसांनी लाठीहल्ला करून जमावाला पांगवले. ठाणे आणि मुंबईतही अफवा पसरली. ठाण्यात बाजारपेठेतील सर्व दुकाने भराभर बंद झाली.

आकाशवाणीवर जाहिराती

नवी दिल्ली - भारतीय आकाशवाणीवर विविध भारती व अन्य ठिकाणी मर्यादित स्वरूपात व्यापारी जाहिराती प्रसारित करण्यास केंद्रीय मंत्रिमंडळाने तत्त्वतः मान्यता दिली. तसेच, परिस्थिती अनुकूल होताच दूरचिवाणीवरही जाहिराती घेण्यास तत्त्वतः मान्यता देण्यात आली. चंदा समितीच्या शिफारशींनुसार हा निर्णय आहे.