२२ जून १९६७

अण्वस्त्रसज्जता नकोच

नवी दिल्ली - भारताने अणुशक्तिमान बनून चीनच्या तोडीस तोड म्हणून अणुबाँब बनवण्यास प्रारंभ करावा, ही मागणी हंगामी परराष्ट्रमंत्री स्वर्णसिंग यांनी आज लोकसभेत फेटाळून लावली. स्वर्णसिंग यांचे निवेदन संपल्यावर खासदार जॉर्ज फर्नांडिस व इतर ६० सदस्यांनी त्यावर प्रश्न विचारण्यास सुरवात केली. जेमतेम पाच-सात जणांनी प्रश्न विचारल्यावर उपसभापती र. के. खाडिलकर यांनी वेळ भरल्याचे सांगून पुढील विषय हाती घेण्याचा निर्णय दिला.

गर्भपात कायद्यात बदल

नवी दिल्ली - सध्याचा पुराणा गर्भपातविषयक कायदा सुधारण्यासारखी सबळ कारणे जरूर आहेत, असा निष्कर्ष शांतिलाल शाह समितीने काढला आहे. महाराष्ट्राचे माजी आरोग्य व कायदेमंत्री व सध्याचे खासदार शांतिलाल शाह यांच्या अध्यक्षतेखाली सप्टेंबर १९६४ मध्ये ही समिती नेमण्यात आली होती.

सुवेझ बंदच

नवी दिल्ली - सुवेझ कालवा पुन्हा वाहतुकीस खुला होण्यास तीन ते चार महिने तरी लागतील, असा अंदाज आहे. कालव्याची दुरुस्ती करण्यास व बुडालेल्या बोटी वर काढण्यास तेवढा तरी वेळ लागेल, असे इजिप्तचे पंतप्रधान नासर यांना वाटते. त्यांच्या मते सुवेझचा प्रश्न हा ताकदीचा नसून राजकीय आहे.

समाधानकारक पाऊस

मुंबई - गोव्यापासून गोंदियापर्यंतच्या महाराष्ट्राच्या सगळ्या विभागांतून यंदा मृग नक्षत्राचा समाधानकारक पाऊस पडल्याची नोंद झाली आहे.

आर्थिक सवलती

ठाणे - आर्थिकदृष्ट्या कमकुवत असलेल्या गटातील मुलामुलींना माध्यमिक शिक्षणासाठी आर्थिक सवलती देण्याचा निर्णय ठाणे पालिकेने घेतला आहे. पालिकेच्या उपाध्यक्ष व शिक्षण समितीच्या अध्यक्ष श्रीमती शलिनी भोईर यांनी हा ठराव मांडला व २१ विरुद्ध एक अशा बहुमताने संमत झाला. सभेच्या अध्यक्षस्थानी नगराध्यक्ष आणि ज्येष्ठ कवी पी. सावळाराम होते.

'मरीनर ५' शुक्राच्या दिशेने

पेसाडेना - अमेरिकेचे अवकाशयान 'मरीनर ५' काल शुक्राच्या दिशेने बिनचूक जात होते. कॅलिफोर्नियातील जेट प्रॉपल्शन लॅबोरेटरीच्या वैज्ञानिकांनी सोमवारी 'मरीनर ५'कडे रेडिओ संदेश पाठवून त्याचा मार्ग बदलला. १९ ऑक्टोबरला 'मरीनर ५' पृथ्वीपासून २१ कोटी २५ लाख मैल अंतरावर जाऊन शुक्राजवळ पोहोचेल.