फ्रान्समध्ये सार्वमत
पॅरिस - फ्रान्सचे अध्यक्ष द गॉल यांनी आपल्या मंत्रिमंडळाला आज असा इशारा दिला की चालू संघर्ष हा फ्रेंच समाजाच्या पायालाच धक्का देणारा असून त्यासाठी आपण येत्या जून महिन्यात सार्वमत घेणार आहोत. अधिकृत गोटातून असेही सांगण्यात आले की चार तासांच्या मंत्रिमंडळाच्या बैठकीनंतर जनरल द गॉल म्हणाले की सरकारला ज्या अनेक गोष्टी करता येण्यासारख्या होत्या त्या करण्यात आल्या नाहीत.
काँग्रेसद्वेष फोल
रत्नागिरी - केवळ काँग्रेसद्वेषावर आधारलेल्या विरोधी पक्षांच्या संयुक्त आघाड्या उभारून देशापुढील जटील प्रश्न सुटणार नाहीत, उलट त्यामुळे अनागोंदी व अस्थिरताच निर्माण होते हा कटू अनुभव गेल्या निवडणुकीनंतर निम्म्या भारतात निर्माण झालेल्या संयुक्त सरकारांच्या कारभारावरून आला आहे, असे उद्गार अखिल भारतीय प्रजासमाजवादी पक्षाचे अध्यक्ष नानासाहेब गोरे यांनी येथे काढले.
गफारखान यांचे ऋण
मुंबई - सरहद्द गांधी म्हणजेच खान अब्दुल गफारखान यांचा ७८वा वाढदिवस महापौर डॉ. रवींद्र कुळकर्णी यांच्या अध्यक्षतेखाली सुंदराबाई हॉलमध्ये आज संध्याकाळी साजरा झाला. खान अब्दुल गफारखान यांचे ऋण भारतातील लोक विसरलेले नाहीत, असे खासदार नानासाहेब कुंटे यांनी यावेळी सांगितले.
विषमता दूर व्हावी
मुंबई - एकात्मतेच्या दृष्टीने आर्थिक दृष्टिकोनातून करता येण्याजोगी आणि आवश्यक गोष्ट म्हणजे शहरी व ग्रामीण विभागातील विषमता दूर करणे होय, असे मत रिझर्व्ह बँकेचे गव्हर्नर लक्ष्मीकांत झा यांनी आपल्या प्रबंधात व्यक्त केले आहे. आज ही दोन स्वतंत्र जगेच आहे, असे त्यांनी म्हटले आहे.
(२४ मे १९६८ च्या अंकातून)