२६ ऑक्टोबर १९६७

सरहद्द गांधींची हाक

कलकत्ता - पख्तुनिस्तानच्या जनतेस न्याय मिळवून देण्यासाठी फक्त माणुसकी म्हणून भारतीय मित्रांनी मदत करावी, अशी एक हाक खान अब्दुल गफारखान यांनी दिली आहे. ते म्हणतात, ‘आनंदाच्या क्षणी माणूस मित्रांना विसरतो. दुःखाच्या वेळी नाही. आम्ही दुःखात आहोत म्हणून आम्हाला तुमची आठवण येते. महात्माजी आज असते तर ते निश्चित आमच्या साहाय्यास आले असते. ते आज आपल्यात नाहीत हेच आम्ही आमचे दुर्दैव मानतो.’

२०० ग्रॅम डाळ

मुंबई - पहाटे चार वाजल्यापासून दुपारी ११ वाजेपर्यंत रांगेत उभे राहून दिवाळीसाठी २०० ग्रॅम वजनाची चण्याची डाळ मिळाल्यानंतर त्या डाळीत दिवाळी कशी साजरी करावयाची याची चिंता मुंबईतील सामान्य गृहिणींना पडली आहे. अशाच काही चिंताग्रस्त गृहिणींनी आज रेशनच्या दुकानातून मिळालेल्या दोन दोन मुठी चणा डाळीच्या छोट्या छोट्या पुड्या बरोबर घेऊन आपला मोर्चा सचिवालयात वळविला होता. २०० ग्रॅम डाळीचे करायचे तरी काय, हा त्यांना पडलेला प्रश्नच पुरवठामंत्र्यांना विचारावा असा गिरगावातील महिला सेवा समितीच्या या कार्यकर्त्यांचा बेत होता. पण त्यांची मंत्र्यांशी भेट झाली नाही.

एरंगळ पर्यटन केंद्र

मुंबई - मालाडपासून चार मैलांवर समुद्रकिनाऱ्यावर विसावलेले एरंगळ हे गाव आता लौकरच आंतरराष्ट्रीय पर्यटन नकाशावरील आकर्षण केंद्र ठरण्याची शक्यता उत्पन्न झाली आहे. एका बाजूला छोट्या टेकड्या तर दुसऱ्या बाजूला पश्चिम सागराचा सुरम्य किनारा यांच्या दरम्यान विसावलेल्या या छोट्या खेड्याचा एक छोटे पर्यटन नगर म्हणून विकास करण्याचे महाराष्ट्र सरकारने ठरविले आहे.

सीमा अहवाल फेटाळला

कोल्हापूर - महाजन मंडळाचा अहवाल महाराष्ट्र सरकारने फेटाळलेला आहे, असे महसूलमंत्री बाळासाहेब देसाई यांनी बेळगावहून आलेल्या शिष्टमंडळास सांगितले. ते म्हणाले की, सीमातंट्यात हा अहवाल म्हणजे काही अंतिम निवाडा नव्हे. तो प्रश्न विधायक व सनदशीर मार्गाने होताळावा लागेल. संसदेत महाराष्ट्राची न्याय्य बाजू महाराष्ट्रातील खासदारांना प्रभावीपणे मांडावी लागेल.