२७ डिसेंबर १९६६

इंदिरा गांधी रायबरेलीतून

नवी दिल्लीः पंतप्रधान इंदिरा गांधी रायबरेली मतदार संघातून लोकसभेची निवडणूक लढविणार आहेत. त्यांचे पती कै. फिरोज गांधी याच मतदार संघातून निवडून येत असत. उत्तर प्रदेशच्या मुख्यमंत्री श्रीमती सुचेता कृपलानी गोंडा लोकसभा मतदारसंघातून उभ्या राहतील. काँग्रेस मध्यवर्ती निवडणूक मंडळाने आज उत्तर प्रदेशातील ८५ पैकी ७७ लोकसभा उमेदवारांची यादी निश्चित केली. कै. लालबहादूर शास्त्री यांचे चिरंजीव हरीकिशन अलाहाबादमधून उभे राहतील. श्रीमती विजयालक्ष्मी पंडित सध्याच्याच म्हणजे फुलपूर मतदार संघातून उभ्या रहात आहेत. हा मतदारसंघ पं. नेहरूंचा आहे.

रस्त्यावरील दिवे

मुंबईः मुंबईतील रस्त्यावरील दिवे एकाचवेळी लावणे अथवा विझविण्याची व्यवस्था बेस्ट कंपनी करणार आहे. १९६५- ६६ सालच्या अहवालात या अॅटोमॅटिक कंट्रोल योजनेबद्दल माहिती दिली आहे. तिसऱ्या योजनेच्या काळात बेस्टने विजेची चार नवीन रिसिव्हिंग स्टेशन्स बांधण्याचे ठरविले होते. परंतु त्यापैकी एकही बांधले गेले नाही.

कारखाना पेचप्रसंग

कोल्हापूरः ऊसकरी शेतकऱ्यांची ऊस दरवाढीची मागणी मान्य झाल्यामुळे दीड महिना बंद राहिलेला कोल्हापूर शुगर मिल हा खासगी साखर कारखाना नुकताच सुरू झाला असला तरी कामगारांच्या बोनस व इतर मागण्यांमुळे पुनः पेचप्रसंग निर्माण होण्याचा संभव दिसतो. कोल्हापूर शुगर मिलच्या येथील वार्षिक सर्वसाधारण सभेच्या वेळी संचालक मंडळाच्या समोर कारखान्याच्या सुमारे एक हजार कामागारांनी ४ टक्क्यांऐवजी २० टक्के बोनस मिळावा आणि ऊसतोडणी व वाहतुकीच्या मजुरीच्या दरात ५० टक्के वाढ करावी अशा मागण्यांच्या घोषणा देऊन निदर्शने केली.

काँग्रेसशिवाय पर्याय नाही

कल्याणः काँग्रेसशिवाय देशाला सध्या तरी दुसरा पर्याय नाही आणि म्हणूनच काँग्रेसला निवडून देऊन ती भक्कम केली पाहिजे, तर ती खंबीरपणे पुढील पाउले टाकील. ती खिळखिळी होऊन तिने दचकत पुढे पाउल टाकणे राष्ट्राला घातक ठरते, असे विचार स. गो. बर्वे ह्यांनी रविवारी कल्याण येथील काँग्रेस कार्यकर्त्यांच्या बैठकीसमोर प्रगट केले. श्री. मोरारजी देसाई ह्यांची लोकपालाची कल्पना फार चांगली असून त्यामुळे राज्य यंत्रणेवर अंकुश राहून तीत सुधारणा होईल, असेही ते म्हणाले.