२९ सप्टेंबर १९६६

 जातींचा भेदभाव खेदजनक

नागपूर -

जनतेच्या मनात अजूनही स्वतःच्या जातीचा नव्हे तर पोटजातीच्याही हितसंबंधाचे विचार प्रबळ आहेत, ही गोष्ट दुर्दैवाची आहे, असे मजूर व रोजगार खात्याचे केन्द्रीय मंत्री जगजीवनराम येथे म्हणाले. मेहतर विविध सहकारी सोसायटीच्या इमारतीची कोनशिला त्यांनी बसवली. महाराष्ट्राचे गृहमंत्री बाळासाहेब देसाई अध्यक्ष होते. सहकारी सोसायटीची ही इमारत जेव्हा पूर्ण होईल तेव्हा सफाई कामगारांच्या मालकीची ही एकमेव इमारत असेल. ते म्हणाले की जातीचा वा पोटजातीचा प्रश्न येतो तेव्हा आपले राष्ट्रीयत्व व आपण सर्व भारतीय, या वस्तुस्थितीला दुय्यम स्थान मिळते.

महाराणी व मेहतराणी

भारतात अनेक शतकांपासून चालत आलेली महाराणी व मेहतराणी यांच्यामधील विषमता राज्यघटनेने कायमची नष्ट केली आली असून महाराणी व मेहतराणी एकाच समान भूमिकेवर येऊन उभी राहिली आहे, असे वेगाने बदलणाऱ्या समाजरचनेचे वर्णन करताना बाबू जगजीवनराम यांनी यावेळी सांगितले.

नवी दख्खनची राणी

मुंबई -

३६ वर्षांपूर्वी मुंबई-पुणे मार्गावर सुरू झालेली "दख्खनची राणी" (डेक्कन क्वीन) ही गाडी गांधीजयंतीपासून नव्या, जास्त आकर्षक आणि आलिशान स्वरूपात धावणार आहे. माटुंगा वर्कशॉपमध्ये बांधलेल्या या गाडीत पहिल्या वर्गाच्या व तिसऱ्या वर्गाच्या २८० जागा आहेत. या गाडीला खास तयार केलेला जेवणाचा डबाही आहे. या गाडीत प्रवाशांच्या सर्व तऱ्हेच्या सुखसोयींकडे लक्ष पुरविण्यात आले आहे. पहिल्या वर्गाच्या प्रत्येक उतारूला या गाडीत प्रथमच स्वतंत्र खुर्ची मिळणार असून ही मागे वळविता येते. या खुर्चीच्या पुढे जेवणासाठी अगर लिहिण्यासाठी एक छोटे घडीचे टेबल आहे. प्रत्येक डब्याला स्वतंत्र प्रसाधनकक्ष (कपडे बदलण्यासाठी आरसा असलेली खोली) आहे आणि सामान ठेवण्यासाठी लहान खोली आहे.

चित्रपट महोत्सव रद्द

नवी दिल्ली -

रुपयाच्या अवमूल्यनामुळे निर्माण झालेल्या परकीय चलन टंचाईमुळे यंदा नोव्हेंबरात भरणारा आंतरराष्ट्रीय चित्रपट महोत्सव रद्द करण्यात येणार आहे. अर्थखात्याने आवश्यक ते परकीय चलन देण्यास अगदी स्पष्ट शब्दात नकार दिल्याने हा निर्णय घ्यावा लागत आहे, असे दिसते.