१ ऑक्टोबर १९६८

गांधीजींवर पुस्तक

नवी दिल्ली: जगप्रसिद्ध नोबेल पारितोषिक विजेते साहित्यिक रोमां रोलां यांनी संपादित केलेला महात्मा गांधी यांच्या १९२० सालापासून निधनापर्यंत ठेवलेल्या रोजनिशीतील काही निवडक भाग गांधी जन्मशताब्दीच्या निमित्ताने साहित्य अकादमी छापत आहे. गांधीजींच्या लिखाणांतील काही निवडक भागांचे भारतीय भाषांतून भाषांतर करण्याची योजनाही आहे. टॉल्स्टॉय आणि भारत या पुस्तकाचेही भाषांतर साहित्य अकादमीतर्फे प्रसिद्ध होत आहे.

विदर्भ बंद

मुंबई -महाराष्ट्र राज्य विधानसभेचे हिवाळी अधिवेशन नागपूरला सुरू होईल, त्या दिवशी विदर्भ बंदचा आदेश देण्यात येणार असून त्याच दिवशी विधानसभेवर एक लाख नागरिकांचा मोर्चा नेण्यात येणार आहे, असे विदर्भ कृषी विद्यापीठ संघर्ष समितीचे निमंत्रक व माजी खासदार बाळकृष्ण वासनिक यांनी आज येथे सांगितले. विदर्भात कृषी विद्यापीठ स्थापन व्हावे, अशा मागणीसाठी हा बंद आहे.

बँकेची मदत दुप्पट

वॉशिंग्टन - पुढील पाच वर्षांत विकासक्षम देशांना दुप्पट मदत देण्याचा जागतिक बँक प्रयत्न करील, असे जागतिक बँकेचे अध्यक्ष रॉबर्ट मॅक्नामारा यांनी बँकेच्या वार्षिक बैठकीत बोलताना आज सांगितले. या वाढत्या मदतीचा फायदा प्रामुख्याने आफ्रिका व लॅटिन अमेरिकामधील देशांना होईल असे ते म्हणाले.

फोनवर गांधीजींचा आवाज

नवी दिल्ली - दिल्लीत टेलिफोनवरून महात्मा गांधींचा आवाज ऐकवण्याची व्यवस्था पोस्ट व तार खात्याने केली आहे. दोन ऑक्टोबरपासून १७२ नंबरवर गांधींजींच्या भाषणातील काही भाग त्यांच्या आवाजात ऐकता येईल. मात्र त्यासाठी मीटरप्रमाणे पैसे द्यावे लागतील.

कांदा एक रुपया किलो

श्रीरामपूर - कांदे येथे सध्या रुपयास एक किलो या भावांनी मिळत आहेत. कांद्याच्या भावात अशी वाढ यापूर्वी कधीच झाली नव्हती. बटाटे मात्र १० आणे किलो भावाने मिळत आहेत.