२४ ऑक्टोबर १९६८

केरळात संप फसला

महाराष्ट्र टाइम्स.कॉम

त्रिवेंद्रम- मार्क्सवादी कम्युनिस्ट पक्षाच्या राज्य शाखेने दिलेल्या आदेशानुसार आज केरळ राज्यात झालेल्या केंद्रविरोधी संपात कालिकत येथे एक मार्क्सवादी कार्यकर्ता ठार झाला. तीन ठिकाणी कम्युनिस्ट व काँग्रेस पक्षियांत चकमकी झडल्या आणि खासदार ए. के. गोपालन यांच्या नेतृत्वाखाली झालेल्या निदर्शनांमध्ये राज्यभरात २० हजारहून अधिक स्वयंसेवकांना अटक करून नंतर सोडून देण्यात आले.

अपोलो पृथ्वीवर परत

केप केनेडी- अपोलो ७ हे अवकाशयान ११ दिवस पृथ्वीप्रदक्षिणा करून काल सकाळी अटलांटिक महासागरात उतरले. या अवकाशयानातील तीनही अंतराळवीरांना 'इसेक्स' या विमानवाहू नौकेने सुरक्षितपणे उचलून घेतले. चंद्रावर मानव कार्यक्रमाचे संचालक जनरल सॅम्युअल फिलिप्स यांनी सांगितले की पुढच्या वर्षी आम्ही चंद्रावर मानव उतरवू शकू.

अभिषेकींची व्यथा

पणजी- गोमंतक हे कलावंतांचे माहेरघर आहे, असे आपण मानतो. परंतु गोव्याच्या नव्या पिढीतून प्रथम श्रेणीचे कलावंत अगर गायक निर्माण होत नाहीत, अशी व्यथा प्रख्यात गायक पंडित जितेंद्र अभिषेकी यांनी येथून १५ मैलांवरील वेलिंग येथे झालेल्या त्याच्या सत्कारप्रसंगी व्यक्त केली. 'रविशंकर व अल्लारखां यांच्यासारखे श्रेष्ठ कलावंत येथे आले असता दीडशे लोकही त्यांच्या कार्यक्रमाला जमले नाहीत. आपली रसिकता तोकडी पडली,' असे ते म्हणाले.

जॅकलिन यांचा विवाह

न्यूयॉर्क- ग्रीक कोट्याधीश अॅरिस्टॉटल ओर्मेसिस यांच्याशी विवाह करण्याच्या जॅकलिन केनेडी यांच्या निर्णयाने केनेडी कुटुंब विषण्ण झाले, असे वृत्त टाइम आणि न्यूजवीक या साप्ताहिकांनी ताज्या अंकाच्या मुखपृष्ठकथेत दिले आहे. 'न्यूजवीक'ने म्हटले आहे की दिवंगत राष्ट्राध्यक्ष जॉन केनेडी यांच्यापासून झालेली दहा वर्षे वयाची कन्या कॅरोलिन ही सर्वांत दु:खी आहे.

(२४ ऑक्टोबर १९६८च्या अंकातून)