मटा ५० वर्षांपूर्वीं-मुंबईत वृक्षराजीची गरज

मुंबईत वृक्षराजीची गरज

मुंबई

मुंबई शहरात झाडे लावण्याची अत्यंत आवश्यकता आहे, पण झाडे लावताना तारतम्य मात्र सांभाळले पाहिजे असे प्रख्यात वन्स्पती शास्त्रज्ञ व राष्ट्रीय प्राध्यापक फादर सान्तपा यांनी आज 'महाराष्ट्र टाइम्स'ला मुलाखत देताना सांगितले. मुंबईत फळझाडे लावता कामा नयेत असे सांगून ते म्हणाले की जांभुळ, नीम, पांगारा, वड, पिंपळ, विलयती शिरीष, अशोक, गुलमोहर आदी लावता येतील. पण वड, पिंपळ इमारतीच्या जवळ लावणे इष्ट नाही, कारण त्याची पाळे उप्रदवकारक असतात.

अत्रे यांच्या प्रकृतीत सुधारणा

मुंबई

काविळीच्या आजाराने अचानक आजारी झालेल्या आचार्य प्र. के. अत्रे यांना आज सायंकाळी के. ई. एम. रुग्णालयात हलविण्यात आले असून काविळीने दूषित झालेले रक्त काढून टाकून नवे रक्त देण्याचा उपचार (ब्लड ट्रान्स्फुजन) त्यांच्यावर तिथे करण्यात येणार आहे.

एकमेव वाघीण

नवी दिल्ली

दिल्लीच्या प्राणी संग्रहालयातील १४ वर्षांची राधा वाघीण गेल्या आठवडयात व्याली आणि तिला चार बछडी झाली. या पिवळ्या जर्द वाघिणीचा एक बच्चा पांढरा शुभ्र असून राधेने आतापर्यंत १५ पांढऱ्या बछड्यांना जन्म दिला आहे. जगातील व देशातील कोणत्याही वाघिणीपेक्षा राधेने अधिक पांढऱ्या बच्चांना आजवर जन्म दिला.

१६ जुलै निश्चित

वॉशिंग्टन

चंद्रावर माणूस उतरविण्यासाठी अपोलो ११ यान १६ जुलै रोजी अंतराळात उडविण्याच्या दृष्टीने अमेरिकन अंतराळ संस्थेची सर्व सूत्रे हलत आहेत, असे आज जाहीर करण्यात आले.

लॅटिन अमेरिकेत संधी

पुणे

लॅटिन अमेरिकन राष्ट्रांविषयीचे अज्ञान भारताने दूर केले पाहिजे, तसेच त्या राष्ट्राशी व्यापार उदीमाचे निकटचे संबंध जोडायला हवेत. तेथे स्थायिक होण्यासाठी भारतीयांना संधी आहे, असे उद्योगपती शंतनुराव किर्लोस्कर यांनी आज येथे लॅटिन अमेरिकेचा दौरा करून आल्यानंतर पत्रकारांना सांगितले.