मटा ५० वर्षांपुर्वी-कम्युनिस्टांवर बंदी

राष्ट्रीयीकरण प्रश्नी मतभेद

बंगलोर - काँग्रेस कार्यकारिणीची बैठक आज मध्यरात्रीनंतरही चालली होती. पण बँक राष्ट्रीयीकरणाच्या प्रश्नावरील प्रखर मतभेदांमुळे आर्थिक धोरण ठरावाचा मसुदा कार्यकारणीला तयार करता आला नाही. गृहमंत्री यशवंतराव चव्हाण व इतर काही सदस्यांनी कार्यकारणीत फूट पडू देऊ नये, अशी आग्रहाची विनंती केली. आजच्या चर्चेच्या आधारे ठरावाचा मसुदा तयार करण्याचे काम कार्यकारिणीने श्री. चव्हाण यांच्यावर सोपवले. उद्या महासमितीची बैठक संपल्यानंतर संध्याकाळी कार्यकारिणीत या मसुद्यावर चर्चा होईल. या मसुद्यात बँक कार्यकारिणीचा उल्लेख काढण्यात येईल, पण बँकांवरील सामाजिक नियंत्रणाची योजना अधिक परिणामकारक बनवण्याची पंतप्रधानांची पर्यायी सूचना ठरावात समाविष्ट करण्यात येईल.

डॉ. पिसुर्लेकर कालवश

पणजी - सुप्रसिद्ध इतिहास संशोधक डॉक्टर पांडुरंग सखाराम पिसुर्लेकर यांचे आज सकाळी सहाला कर्करोगाने निधन झाले. ते ७५ वर्षांचे होते. आज सायंकाळी चारला त्यांची अंत्ययात्रा निघाली व सहाला हिंदू स्मशानभूमीवर त्यांचा अंत्यसंस्कार झाला. ३० मे १८९४ रोजी त्यांचा जन्म पिसुर्ले येथे झाला होता.

कम्युनिस्टांवर बंदी

बंगलोर- डावे कम्युनिस्ट नेते नंबुद्रीपाद, ए. के. गोपालन यांची अलीकडची निवेदने लक्षात घेता कम्युनिस्ट पक्षावर बंदी घालावी अशी मागणी आज काँग्रेस महासमितीच्या बैठकीत अनेक सदस्यांनी केली. चांगला कारभार चालवण्यासाठी नव्हे, तर घटनेचा विध्वंस करून लोकशाही नष्ट करण्यासाठी आपल्या पक्षाने केरळ व पश्चिम बंगालसारख्या राज्यात सत्ता स्वीकारली, असे जाहीर निवेदन या नेत्यांनी केले होते.

इंग्लंडची घसरगुंडी

लीड्स (इंग्लंड) - पावसामुळे वेस्ट इंडिज व इंग्लंड यामधील तिसऱ्या कसोटी सामन्यातील आज पहिल्या दिवशीचा खेळ एक तास वीस मिनिटे उशिरा सुरू झाला. नाणेफेक जिंकून इंग्लंडने फलंदाजी घेतली खरी, पण ती चांगलीच अंगाशी आली. कारण इंग्लंडला पहिल्या डावातील १९४ डावा जमवण्यासाठी सात फलंदाज खर्ची टाकावे लागले.