मटा ५० वर्षांपूर्वी- पतौडीचा नवाब कर्णधार

कडक पत्र

नवी दिल्ली - काँग्रेसमधील दोन प्रतिस्पर्धी गटात आज दिवस-रात्र ज्या जोराच्या हालचाली सुरू होत्या त्यावरून काँग्रेस दुभंगण्याची चिन्हे जवळ जवळ स्पष्ट दिसू लागली आहेत. त्यातच श्री. निजलिंगप्पा यांनी श्रीमती गांधी यांना परखड भाषेत एक पत्र लिहून काँग्रेस पक्ष उद्ध्वस्त करण्याचा प्रयत्न तुम्ही करीत आहात, असा आरोप केला आहे. या पत्रात श्री. निजलिंगप्पा यांनी श्रीमती गांधी यांच्या काही ज्येष्ठ सहकाऱ्यांवरही पक्षविरोधी कारवाया केल्याचा आरोप केला आहे. बंगलोरच्या काँग्रेस महासमितीच्या बैठकीपासून या घटना घडल्या, त्याचा या पत्रात उल्लेख करण्यात येऊन श्री. निजलिंगप्पा यांनी श्रीमती गांधी व त्यांचे सहकारी यांचेवर बेशिस्तीने वागण्याचा, पक्षात दुफळी माजविण्याचा आरोपपत्रात केला आहे.

जनता मिठाईला मागणी

मुंबई - पाच रुपये किलो व स्वस्त दराने विकल्या जाणाऱ्या जनता मिठाईकरिता आज सायंकाळपर्यंत नोंदलेली मागणी एक लाखाहून अधिक किलोंची असल्याचे सांगण्यात येते. महाराष्ट्र सरकार पुरस्कृत या योजनेचा परिणाम मिठाईच्या बाजारावरही झाला असून बहुतेक मिठाईवाल्यांनी आपले भाव तीन रुपयांनी खाली आणले आहेत. दिवाळीच्या सुमारास मिठाईचे भाव वाढू लागतात. पण यावर्षी मात्र जनता मिठाईमुळे हे भाव घसरले आहेत. सर्वसामान्य जनतेस दिवाळीत तरी स्वस्त मिठाई मिळावी, याकरिता नागरी पुरवठामंत्री भाऊसाहेब वर्तक यांनी ही योजना तयार केली आहे.

पतौडीचा नवाब कर्णधार

मुंबई - भारत आणि ऑस्ट्रेलिया यांच्यात होणाऱ्या क्रिकेट कसोटी सामन्यांच्या मालिकेतील पहिल्या दोन सामन्यांसाठी भारतीय संघाचा कर्णधार म्हणून पतौडीचा नवाब याची निवड झाली आहे. म्हणजे मुंबई आणि कानपूर येथील दोन सामन्यासाठी तो कर्णधार राहील.

(३१ ऑक्टोबर, १९६९च्या अंकातून)