अ‍ॅपशहर

११ डिसेंबर १९६७

११ डिसेंबर १९६७

Maharashtra Times 11 Dec 2017, 4:00 am
सांगलीत २९० जखमी
महाराष्ट्र टाइम्स.कॉम 50 years ago 11 december 1967
११ डिसेंबर १९६७

सांगली - केंद्रीय गृहमंत्री यशवंतराव चव्हाण यांची मिरवणूक महाराष्ट्र प्रदेश काँग्रेसच्या बैठकीच्या ठिकाणाकडे जात असता संपूर्ण महाराष्ट्र समितीचे निदर्शक व काँग्रेसजन आणि निदर्शक व पोलिस यांच्यात आज सांगलीत चकमकी होऊन २९० लोक जखमी झाले. त्यात १६२ पोलिस आहेत. सीमाविषयक महाजन अहवालाच्या निषेधार्थ ही निदर्शने झाली. मिरवणूक ठरल्याप्रमाणे पार पडली. सांगलीच्या सबडिव्हिजनल मॅजिस्ट्रेटनी १५ डिसेंबरपर्यंत सभा मिरवणुकींना बंदी घातल्याचा हुकूम रात्री काढला.

गायीच्या मालकास शिक्षा
मुंबई - भटक्या गुरांचा बंदोबस्त करण्यासाठी १९५१ मध्ये करण्यात आलेल्या पोलिस कायद्यान्वये सरकारला देण्यात आलेले अधिकार, नियम करून सरकारने आजपर्यंत स्वतःकडे घेतले नाहीत, असा खळबळजनक आरोप मुंबईचे नामांकित वकील बॅ. राजा भोसले व बॅ. विठ्ठल गाडगीळ यांनी ‘महाराष्ट्र टाइम्स’ला मुलाखत देताना केला. या कायद्याप्रमाणे गाय बांधून न ठेवता मोकळी सोडणाऱ्या गायीच्या मालकाला सहा महिने कैदेची शिक्षा आणि दंडही देण्याचा अधिकार सरकारला आहे, असे ते म्हणाले.

विज्ञान मातृभाषेतून हवे
मुंबई - विज्ञानाचे शिक्षण मातृभाषेतून देण्याची सोय केल्यास विज्ञानाचा सामान्य माणसापर्यंत प्रसार होईल आणि त्यांच्यातूनच नवे शास्त्रज्ञ निर्माण होतील, असे मत उपपंतप्रधान मोरारजी देसाई यांनी येथे व्यक्त केला. विज्ञानाच्या शिक्षणाचा जास्तीत जास्त उपयोग मातृभाषेतून शिक्षण दिल्यानेच होईल, असे सांगितले.

भाजीपाला अत्यल्प
नवी दिल्ली - भारतात कंदमुळे खाण्याची प्रथा किती जुनी. शाकाहाराचे प्रस्थही आपल्याकडे फार. पण सर्वसाधारण भारतीय रोज सरासरी किती भाजीपाला खात असेल? फक्त ८० ग्राम्स. युरोप अमेरिकेत हे प्रमाण ३६२ ग्राम्स इतके आहे. जागतिक शेती संघटनेने आयोजित केलेल्या परिसंवादात भाग घेताना केंद्रीय अन्न व शेतीमंत्री जगजीवनराम यांनी ही माहिती दिली.

३०० गुऱ्हाळांना सील
कोल्हापूर - गुळाला भाव चांगला असल्याने साखर कारखान्याना ऊस घालण्याऐवजी गूळ बनविण्याकडे या भागातील शेतकऱ्यांची प्रवृत्ती आहे. साखर कारखान्याचा ऊस कमी पडून उत्पादनात घट होऊ नये, या उद्देशाने सरकारने उपाययोजना चालू केली असून साखर कारखाना सभासदानी सुरू केलेल्या करवीर तालुक्यातील सुमारे ३०० गुऱ्हाळांना मामलेदाराने सील ठोकले.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज