५० वर्षेः बुधवार २१ फेब्रुवारी

बुधवार २१ फेब्रुवारी १९६८

पहिला परदेशी विजय

इंडीज - आज उपाहारानंतर चंदु बोर्डेच्या फटक्याने भारताला न्यूझीलंडविरुद्ध पहिल्या कसोटी सामन्यात पाच गडी राखून विजयी केले तेव्हा भारतीय क्रिकेटपटू आनंदाने नाचू लागले. भारतीय क्रिकेट संघाने परदेशी मिळविलेला हा पहिला विजय होय.

पहिल्या डावात विजयी

मुंबई - रणजी करंडकाची राष्ट्रीय स्पर्धा लागोपाठ दहाव्यांदा जिंकून मुंबई संघाने आज क्रिकेटच्या जगात एक वेगळाच विक्रम प्रस्थापित केला. ऑस्ट्रेलियाची राष्ट्रीय क्रिकेट स्पर्धा न्यू साऊथ वेल्सने लागोपाठ नऊदा जिंकली होती. लागोपाठ राष्ट्रीय स्पर्धा जिंकण्याचा हा उच्चांक मुंबईच्या विजय मालिकेने आज मोडला गेला.

हेग न्यायालयात दाद

नवी दिल्ली - भारत सरकारने कच्छ निवाड्याविरुद्ध हेगच्या आंतरराष्ट्रीय न्यायालयात दाद मागावी अशी मागणी काँग्रेस संसदीय पक्षाच्या आजच्या बैठकीत अनेक सदस्यांनी केली. दरम्यान, भूज येथे कच्छचा काही भाग पाकिस्तानला देण्याच्या आंतरराष्ट्रीय लवादाच्या निवाड्याचा निषेध म्हणून भूज येथे व कच्छमध्ये अन्यत्र आज संपूर्ण हरताळ पाळण्यात आला.

१४ मार्चला भारत-पाक बैठक

नवी दिल्ली - कच्छ मंडळाच्या निवाड्याची अंमलबजावणी कशा प्रकारे करावी यासंबंधी भारत व पाकिस्तान यांच्या दरम्यान यापूर्वीच मतैक्य झाले आहे. सीमारेषा आखण्याच्या व्यवस्थेसाठी उभय देशाच्या प्रतिनिधींची बैठक १४ मार्चला दिल्लीत भरणार आहे. उभय देशांनी मंडळाचा निर्णय पाच महिन्यांच्या आत अंमलात आणण्याचे यापूर्वीच मान्य केले आहे. ही अंमलबजावणी पूर्ण होईपर्यत कच्छ मंडळ अस्तित्वात राहील.

अराजकाचा वाढता धोका

मुंबई - संसदीय पद्धतीची राजवट अयशस्वी होत असल्यामुळे अध्यक्षीय पद्धतीचे फेडरल सरकार आपल्या देशात अधिक उपयुक्त ठरेल काय, याचा अभ्यास करण्याची वेळ आहे आहे, असे उद्गार जे. आर. डी. टाटा यानी आज इंडियन मर्चंट्स चेंबरच्या ६०व्या वार्षिक सभेचे उद्घाटन करताना काढले. गेल्या सार्वत्रिक निवडणुकीत दिसून आलेल्या प्रवृत्ती १०७२ मध्ये अधिक वाढून अराजक निर्माण होईल, अशी भीती त्यांनी व्यक्त केली.