५० वर्षे, मंगळवार २० फेब्रु

मंगळवार २० फेब्रुवारी १९६८

१० टक्के भाग पाकला

जिनीवा - कच्छच्या रणाचा सुमारे ३२० चौरस मैल भाग पाकिस्तानला देण्याचा निर्णय आंतरराष्ट्रीय निवाडा मंडळाने आज जाहीर केला. पाकिस्तानने एकूण ३५०० चौरस मैल प्रदेशावर आपला हक्क सांगितला होता. या निर्णयानुसार कंजारकोट, धारावाणी आणि छाड बेट हे विभाग पाकिस्तानला मिळाले आहेत. १९६५ साली एप्रिल महिन्यात या दोन भागावरून संघर्ष निर्माण झाला होता.

भारताला मान्य, पाक खूष

नवी दिल्ली - कच्छ निवाडा मंडळाच्या निर्णयाचे व्यापक राजकीय परिणाम कोणते होतील याचा विचार करण्यासाठी केंद्रीय मंत्रिमंडळाची बैठक आज रात्री उशिरा भरली होती. भारत आणि पाकिस्तान या दोन्ही देशांना बंधनकारक असलेल्या या निर्णयाचा स्वीकार केला असल्याचे निवेदन पंतप्रधान उद्या करतील. दरम्यान, पाकिस्तानचे परराष्ट्र मंत्री शरिफुद्दीन पीरजादा यानी आंतरराष्ट्रीय लवाद मंडळाने कच्छच्या रणासंबंधी दिलेल्या निवाड्याबद्दल आज आनंद व्यक्त केला.

मुंबईत हृदय रोपण

मुंबई - हृदयाचे कलम करण्याचा भारतातील पहिला प्रयोग शनिवारी पहाटे येथील के. ई. एम. हॉस्पिटलमध्ये करण्यात आला. एका तरुणीचे हृदय एका पुरुषाला यशस्वीरित्या बसविण्यात आले. हृदय बसविण्याचे काम दोन तास चालले होते. शस्त्रक्रिया केलेल्या माणसाच्या नवीन हृदयाचे ठोकेही पडू लागले आणि तीन तास नीट चाललेले हृदय, फुस्फुसामध्ये एकाकी बिघाड झाल्यामुळे बंद पडले आणि सदर मनुष्य मरण पावला. तांत्रिकदृष्ट्या ही शस्त्रक्रिया यशस्वी झाली, असे शस्त्रक्रिया करणाऱ्या डॉक्टरने सांगितले.

चुंबनाबद्दल दंड

कऱ्हाड - राजमहल चित्रमंदिरात १४ फेब्रुवारीस रात्री चित्रपट चालू असताना एका युवतीचे चुंबन घेऊन प्रेम चाळे केल्याच्या आरोपावरून येथील ज्युडिशियल मॅजिस्ट्रेट एस. एस. ठाकूर यांनी या तरुणीसह चौघांना दंडाची शिक्षा ठोठावली. निकाल ऐकण्यास कोर्टात खूप गर्दी झाली होती. तरुणीला पाच रुपये तर बनचंद्र बहुमल भंडारी यास तीस रु, धनरज ओस्वाल यास ४० रु व चित्रमंदिराचा डोअरकीपर निवृत्ती देसाई यास ५० रु दंडाची शिक्षा सांगितली.