६ एप्रिल १९६८
मार्टिन लूथर यांचा खून
मफिस (टेनेसी, अमेरिका): अमेरिकेतील सुप्रसिद्ध निग्रो नेते, अहिंसेचे पुरस्कर्ते, महात्मा गांधींचे अनुयायी व नोबेल पारितोषिकाचे विजेते डॉ. मार्टिन लूथर किंग हे आपल्या गुरूप्रमाणेच काल रात्री हिंसेचे बळी झाले. एका इसमाने काल रात्री त्यांच्यावर गोळी झाडल्यामुळे रुग्णालयात ते मृत्यू पावले. डॉ. किंग यांचे वय अवघे ३९ वर्षांचे होते. गोळी लागून डॉ. किंग मरण पावले, असे पोलिस कमिशनर फ्रँक हॉलोमन यांनी जाहीर केले. डॉ. किंग लॉरेन हॉटेलाच्या दुसऱ्या मजल्याच्या बाल्कनीत उभे असता एका इसमाने लपून त्यांच्यावर गोळी झाडली. जखमी अवस्थेत त्यांना सेंट जोसेफ रुग्णालयात नेण्यात आले. दरम्यान, हे वृत्त पसरताच अमेरिकेत अनेक ठिकाणी दंगली उसळल्या. निग्रो लोकांनी गोऱ्यांवर हल्ले करण्यास प्रारंभ केला.
शांततेचे देवदूत
नवी दिल्लीः अमेरिकन गांधी म्हणून ओळखले जाणारे सुप्रसिद्ध निग्रो नेते डॉ. मार्टिन लूथर किंग यांच्या निघृण हत्येबद्दल आज लोकसभेत तीव्र दुःख व संताप व्यक्त करण्यात आला. प्रश्नोत्तराच्या तासानंतर पंतप्रधान इंदिरा गांधी यांनी जड अंतःकरणाने हे दुःखद वृत्त सभागृहाला सांगताच सर्वच सभासदांना कमालीचा धक्का बसला व सगळे सुन्न झाले. आपल्या भाषणात इंदिरा गांधी यांनी, डॉ. किंग मानवतेचे उपासक व शांततेचे देवदूत होते, असे सांगितले.
चित्रपटगृहे बंद
मुंबईः चित्रपट निर्मात्यांच्या निरोधनामुळे आज शहरातील हिंदी चित्रपट दाखविणारी बहुतेक चित्रपटगृहे बंद ठेवण्यात आली. "फिल्मसेने"च्या निदर्शकांनी अंगिकारलेल्या जबरदस्तीच्या धोरणाच्या निषेधार्थ चित्रपटगृहे बेमुदत बंद ठेवण्याचा निर्णय थिएटर ओनर्स असोसिएशनने घेतला आहे.
करारास नकार
नवी दिल्लीः परकीय मदत बंद झाली तरी चालेल पण अण्वस्त्रप्रसारविरोधी करारावर सध्याच्या स्वरूपात भारत सरकार सही करणार नाही, असे निःसंदिग्ध आश्वासन पंतप्रधान इंदिरा गांधी यांनी आज लोकसभेत दिले. पंतप्रधान म्हणाल्या, करारावर सही करण्यास आम्ही नकार दिल्यामुळे अनेक अडचणी येण्याचा संभव आहे, परकीय मदत बंद होण्याचाही धोका आहे. पण या संकटांना तोंड देण्याची देशाची तयारी आहे, अशी माझी खात्री आहे. स्वावलंबनाच्या दिशेने हे पहिले पाऊल ठरेल.