६ डिसेंबर १९६७

नवी दिल्ली - हिंदी ही भारताची जोडभाषा राहील; परंतु आपण आपल्याबरोबर सर्व राज्यांना घेऊन चालणे आवश्यक आहे, असे पंतप्रधान इंदिरा गांधी यांनी आज राज्यसभेत सांगितले. इंग्रजी ताबडतोब रद्द करा, अशी मागणी संयुक्त समाजवादी पक्षाचे खासदार राजनारायण यांनी भावोत्कटतेने केली असता, त्याला प्रतिसाद देताना श्रीमती गांधी म्हणाल्या, ‘‘जोडभाषा म्हणून आम्हाला इंग्रजी नको आहे. इंग्रजीची जागा हिंदीने घेतली पाहिजे. परंतु आंतरराष्ट्रीय जोडभाषा म्हणून इंग्रजी राहावी. आंतरराष्ट्रीय दळणवळणाचे साधन म्हणून फक्त इंग्रजी ठेवावयाची आहे.’’

साखर धोरणावर टीका

नवी दिल्ली - साखरेचे अंशतः निर्नियंत्रण करण्याच्या सरकारी धोरणावर लोकसभेत आज प्रश्नोत्तरांच्यावेळी विरोधी सदस्यांनी जोराचा हल्ला चढविला. जनसंघाचे कन्वरलाल गुप्ता म्हणाले, सरकारचे साखर धोरण साफ फसले आहे. यामुळे उद्योगपतींना ५० कोटींचा नफा होणार आहे.

तरते विद्यापीठ

मुंबई - कॅलिफोर्नियाच्या ऑरेंज विद्यापीठाचे ५२६ विद्यार्थी, प्राध्यापक आणि शाखाप्रमुख आज रिन्डॅम या तरत्या विद्यापीठ बोटीवरून येथे पोचले. मुंबई पोलिसांच्या बँडवादनाने त्यांचे स्वागत झाले. ही बोट पाच दिवस मुंबईत थांबेल. विविध विद्यापीठांतील दोनशे कॉलेजातील हे विद्यार्थी आहेत.

पक्षांतराची साथ

चंदीगड - पक्षांतराची साथ थांबवण्यासाठी आता निवडणूक कायदे अधिक कडक व काटेकोर करण्याची आवश्यकता निर्माण झाली आहे, असे प्रमुख निवडणूक कमिशनर सेनवर्मा यांनी सांगितले.

मैदा नसल्याने बेकऱ्या ओस

सातारा - सातारा जिल्ह्यात वेळेवर मैदा पुरवठा होत नसल्याने बेकऱ्या बंद पडण्याची शक्यता आहे. याबाबत खाद्यपेय विक्रेता संघाचे चेअरमन श्रीनिवास भट म्हणाले की गव्हाचा पुरवठा सरकारकडून वेळेवर होऊ शकत नसल्याने, ‘वेस्टर्न इंडिया फ्लोअर मिल’चे काम सध्या बंद आहे.

बाँबफेकीचा हिशेब

वॉशिंग्टन - दुसऱ्या जागतिक महायुद्धात युरोपात वापरले नसतील इतके व कोरियाच्या युद्धाच्या दुपटीने बाँब अमेरिकेने एकट्या व्हिएतनामवर टाकल्याचे अमेरिकी संरक्षण कार्यालयाने जाहीर केले. जुलै १९६५ ते १५ नोव्हेंबर १९६७ या काळात अमेरिकेने व्हिएतनाममध्ये १६ लाख ३० हजार ५०० टन बाँब टाकले.