\Bमराठी कथांचे जर्मन बुक
बॉन\B - मराठी लघुकथा लेखकांना अभिमान व आनंद वाटणारी घटना येथे घडत आहे. मराठी लघुकथांचा वाचकांचे क्षेत्र आता वाढले असून जर्मन भाषिक लोकांनाही या कथा वाचण्याची संधी मिळत आहे. 'रिक्लेम' या स्टुटगार्टच्या प्रकाशकाने मराठी भाषेतील प्रातिनिधिक लघुकथांचे भाषांतर असलेले पॉकेटबुक प्रकाशित केले आहे. 'ओल्ड मॅन अँड आदर मराठी शॉर्ट स्टोरीज' या पुस्तकात गंगाधर गाडगीळ, महादेवशास्त्री जोशी, वामन चोरघडे, अरविंद गोखले, व्यंकटेश माडगूळकर या प्रमुख मराठी लेखकांच्या लघुकथा आहेत.
\Bदुसरा दरोडा
कलकत्ता \B- सशस्त्र दरोडेखोर व कोळसा खाणीतील कामगार यांच्यामध्ये झालेल्या चकमकीत सहा लोक ठार झाले. कामगारांचा पगार वाटण्यासाठी म्हणून आणलेले दोन लाख रुपये लुटून पळून जाण्याचा दरोडेखोरांचा बेत होता. बरद्वान जिल्ह्याच्या असनसोल भागातील जयकायनगरजवळ हा प्रकार झाला. ठार झालेल्यांमध्ये तीन दरोडेखोर, कोळसा खाणीतील कॅशियर, दोन कामगार आहेत. पूर्व संग्राम कोळसा खाणीतून निमचा खाणीकडे कामगारांचा पगार देण्यासाठी व्हॅनमधून ही रक्कम नेली जात होती. एकाकी रस्त्यावरून जात असता दरोडेखोरांनी ती अडविली. प्रतिकार करता दरोडेखोरांनी गोळीबार केला, यामध्ये गाडीतला कॅशियर ठार झाला. प. बंगालमध्ये गेल्या २४ तासांत भर दिवसा झालेला दरोड्याचा हा दुसरा प्रकार. स्टेट बँकेच्या पार्क स्ट्रीट शाखेवर काल एका दरोड्यात सशस्त्र दरोडेखोरांनी जवळजवळ चार लाख ६२ हजार रुपये लुटले.
\Bलोकलमध्ये खून
मुंबई -\B आज दुपारी मुंब्रा ते कळवा स्टेशनच्या दरम्यान लोकांच्या पहिल्या वर्गाच्या स्त्रियांच्या डब्यात एका विवाहित तरुणीचा निर्घृण खून करण्यात आला. या तरुणीचे वय २२ ते २५ च्या दरम्यान असून तिचे नाव मंदा पाटणकर असे आहे. त्या डोंबिवलीच्या असून एमएचा अभ्यास करीत होत्या. आज भरदुपारी धावत्या लोकलमध्ये हा भयानक प्रकार घडला. पहिल्या वर्गाच्या डब्यात रक्ताच्या थारोळ्यात त्या तरुणीचे प्रेत मिळाले. तिच्या अंगावर अनेक घाव होते.
\B(१४ डिसेंबर, १९६९च्या अंकातून)\B