चव्हाण यांचा राजीनामा?
मुंबई - पाटबंधारे मंत्री शंकरराव चव्हाण यांनी राजीनामा दिल्याच्या वृत्तामुळे विधिमंडळ व आमदार निवासाच्या परिसरात प्रचंड खळबळ उडाली. १९७०-७१ सालच्या कालच सादर झालेल्या अर्थसंकल्पातील पाटबंधारे खात्याच्या मागण्याबाबत चव्हाण यांनी सुचवलेल्या रकमांच्या बाबतीत आपल्या अपरोक्ष काही बदल झाल्याची चव्हाण यांची तक्रार असून आपल्यावर हा एक प्रकारचा अविश्वास आहे अशी भूमिका स्पष्ट करणारे पत्र त्यांनी मुख्यमंत्र्यांना लिहिले असून या पत्रात त्यांनी आपल्या राजीनाम्याचा मनोदय व्यक्त केला असल्याचे महाराष्ट्र काँग्रेसच्या गोटातून सांगण्यात आले.
विमला कर्णिक यांचा खून
मुंबई - प्रख्यात विचारवंत आणि कामगार नेते वसंतराव कर्णिक यांच्या पत्नी विमलाबाई कर्णिक (वय ६३) यांचा आज पहाटे गळ्याभोवती मफलर आवळून खून करण्यात आला. गिरगावातील रतिलाल मॅन्शनमध्ये हा खून झाला, त्यावेळी त्या एकट्याच तिथे राहात होत्या. हा खून चोरीच्या उद्देशाने झाला असावा, असा चौकशी करणाऱ्या पोलिसांचा तर्क आहे. त्यांच्या अंगावरील सोन्याच्या बांगड्या व गळ्यातील हार चोरीला गेले आहेत.
गार्डनर कालवश
कॅलिफोर्निया - सुप्रसिद्ध अमेरिकन रहस्यकथा लेखक आणि पेरी मेसन या अविस्मरणीय व्यक्तिचित्राचे जनक जॉन स्टॅनले गार्डनर यांचे काल येथे त्यांच्या राहत्या घरी निधन झाले. ते ऐंशी वर्षांचे होते. त्यांच्या मित्राच्या म्हणण्यानुसार त्यांना कॅन्सरने मरण आले. १९३६ मध्ये त्यांनी लेखनाला सुरुवात केली. तत्पूर्वी, २५ वर्षापर्यंत त्यांनी यशस्वी फौजदारी वकिली केली होती. ते हे अमेरिकेचे ख्यातनाम लेखक होते. त्यांच्या नावावर १४० पुस्तके मोडतात. त्यांची पुस्तके जगभर खपतात. या पुस्तकांच्या एकूण एक कोटी ६७ लाख प्रती खपल्या आहेत.
१३ मार्च, १९७०च्या अंकातून