१२ डिसेंबर १९६८

१२ डिसेंबर १९६८

विद्यापीठे बंद

वाराणसी - बनारस हिंदू विद्यापीठाच्या आवारातील सर्व वर्ग उद्यापासून बेमुदत बंद ठेवण्यात आले आहेत. विद्यापीठाच्या अॅकेडेमिक कौन्सिलच्या स्थायी समितीची बैठक होऊन चार ते आठ डिसेंबर या काळात झालेल्या जाळपोळ व भोसकाभोसकीच्या प्रकारांना विचार करण्यात आला व वर्ग बंद ठेवण्याचा निर्णय घेण्यात आला. काशी विद्यापीठही आजपासून बेमुदत बंद ठेवण्यात आले आहे. तेथे काल विद्यार्थ्यांची पोलिसांशी चकमक उडाली होती. बनारस विद्यापीठाच्या वसतिगृहातील बहुतेक सर्व विद्यार्थी भीतीने अन्यत्र गेले आहेत.

माडगूळकर अध्यक्ष

मुंबई - ग्वाल्हेर येथे भरणाऱ्या मराठी नाट्य परिषदेच्या सुवर्णमहोत्सवी संमेलनाच्या अध्यक्षपदी चित्रपटकथाकार, नाटककार आणि कवि ग. दि. माडगूळकर यांची अविरोध निवड करण्यात आल्याचे अ. भा. परिषदेचे कार्याध्यक्ष भालचंद्र पेंढारकर यांनी जाहीर केले. ग्वाल्हेर येथे पुढच्या वर्षी ८, ९ व १० फेब्रुवारी रोजी हे संमेलन भरत आहे.

मराठा इन्फन्ट्री

बेळगाव - शिवाजीसारख्या महान योद्ध्यापासून प्रेरणा घेणाऱ्या मराठा लाईट इन्फन्ट्रीच्या विविध बटालियन्सनी गेल्या दोनशे वर्षांमध्ये चीनपासून इटलीपर्यंत आणि अफगाणिस्तानपासून आग्नेय आशियापर्यंत रणक्षेत्रावर जे पराक्रम गाजवले त्यांची राष्ट्रपती डॉ. झकीर हुसेन यांनी रेजिमेंटला नवे निशान दान करताना मुक्तकंठाने तारीफ केली. त्यांनी रेजिमेंटच्या व्दिशताब्दी महोत्सव प्रसंगी हे निशान प्रदान केले.

अश्मयुगीन मानव

पुणे -नेवासे तालुक्यातील चिरकी येथील संपूर्ण उत्खननानंतर अश्मयुगातील मानवाचे अवशेष तेथे सापडण्याची शक्यता निर्णण झाली आहे. तेथे सध्या उत्खनन सुरू आहे. नेवासे आणि त्याच्या आसपासच्या परिसरात डेक्कन कॉलेजच्या पुरातत्व विभागाचे प्रमुख डॉ. एच. डी. सांखालिया यांनी फार मोठ्या प्रमाणावर संशोधन करून अतिप्राचीन काळातील अवशेष उजेडात आणले होते.