उपोषणाची समाप्ती

उपोषणाची समाप्ती

नवी दिल्ली - भारतातील हिंसाचार आणि द्वेष यांच्या निषेधार्थ सुरू केलेले तीन दिवसाचे उपोषण खान अब्दुल गफार खान यांनी आज सकाळी सात वाजता मोसंबीचा रस घेऊन सोडले. ऐंशी वर्षे वयाचे गफारखान उपोषणामुळे अशक्त दिसत होते. सर्वोदयी नेते जयप्रकाश नारायण यांनी त्यांना रस दिला. डॉक्टरांनी खाँसाहेबांची प्रकृती तपासून उपोषणाचा त्यांच्यावर प्रतिकूल परिणाम झाला नसल्याचे सांगितले. बादशहा खान यांनी प्रार्थनेसाठी हात वर करून अशी करूणा भाकली की, 'हे परमेश्वरा, आमच्या लोकांवर दया कर. त्यांचा कमकुवतपणा विसरून जा आणि त्यांना सदाचारी व हिंसक मार्ग सोडण्याची बुद्धी दे.'

लग्न आणि जननप्रमाण

मुंबई- भारतातील मुलींनी विसावे वय लागण्यापूर्वी लग्न करावयाचे नाही, असे ठरवले तर पुढील दोन दशकांत भारतातील जननप्रमाण २५ टक्क्यांनी खाली येईल, असा अभिप्राय चेंबूरच्या लोकसंख्याविषयक केंद्राचे संचालक एस. अग्रवाल यांनी व्यक्त केला. त्यांनी विवाहाच्या वेळेचे वय यावर प्रबंध लिहिला असून लंडनच्या लोकसंख्येवरील आंतरराष्ट्रीय परिषदेत वाचून दाखविला. जगभरातील १९ देशांतील विवाहाच्या वयाबाबत हा प्रबंध आहे. ऑस्ट्रेलिया व जपान या देशात स्त्रियांचे विवाहाचे वय सर्वांत जास्त म्हणजे सरासरी चोवीस वर्षे असते, असे आढळले आहे. आशियातील भारत, नेपाळ, पाकिस्तान या देशांत स्त्रीचे विवाहाच्या वेळी सरासरी वय सर्वांत कमी म्हणजे १५ ते १६ वर्षे असते, असा निष्कर्ष या प्रबंधात आहे.

संघावर बंदी नाही

इंदूर- राष्ट्रीय स्वयंसेवक संघावर केंद्र सरकारकडून बंदी घातली जाण्याची बिलकुल शक्यता नाही, असे केंद्रीय गृहखात्याचे राज्यमंत्री विद्याचरण शुक्ल यांनी आज येथे वार्ताहरांना सांगितले.

(७ ऑक्टोबर, १९६९च्या अंकातून)