मटा ५० वर्षापूर्वी - २४ जून १९६९

आरोग्यसेवा कोलमडली

मुंबई - मुंबईतील बारा मोठ्या रुग्णालयांमधील डॉक्टरांच्या संपामुळे शहरातील आरोग्यसेवा बहुतांशी कोलमडली आहे. चार सरकारी रुग्णालयामधील संप गेल्या ११ दिवसांपासून चालू आहे तर महापालिका आरोग्य विमा योजना व वाडिया या आठ रुग्णालयातील संप आजपासून चालू झाला. परंतु नागरी जीवनाच्या महात्वाच्या क्षेत्रातील हा पेचप्रसंग मिटविण्याबाबत आज विशेष अशी कोणतीही हालचाल दिसून आली नाही. या संपास पाठिंबा देण्याकरिता शहरातील इतर डॉक्टर्सही संघटितपणे पुढे येत आहेत. मुंबईतील जनरल प्रॅक्टशनर्स आणि तज्ज्ञ डॉक्टर्स यांची संयुक्त सभा आज इंडियन मेडकल असोसएशनच्या सभागृहात झाली असता संपास पाठिंबा देणारा ठराव एकमताने मंजूर करण्यात आला.

मंत्र्यांचा दर्जा चर्चा

मुंबई - विरोधी पक्षनेत्यास कॅबिनेट मंत्र्याचा दर्जा द्यावा की नाही या प्रश्नाचा निर्णय राष्ट्रीय पातळीवरूनच व्हावा, असे मुख्यमंत्री वसंतराव नाईक यांनी आज विधानसभेत प्रश्नोत्तराचे वेळी सांगितले.

पृथ्वीवर राहणे अशक्य

यृनो - मानव, त्याची शहरे आणि त्याच्या कसबी कामगिऱ्या यामुळे या पृथ्वीवर राहणे अशक्य होऊन बसेल असा संभव दिसतो. मानवापुढील समस्याबाबत यूनोला सादर करण्यात आलेल्या अहवालात हा इशारा आहे. पृथ्वीतलावरील लोकांची गर्दीच गर्दी, शहरातील दाट गर्दी आणि तांत्रिक शोधांतील दुष्परिणाम यांना वेळीच आळा घातला नाही तर सध्या जिवंत असलेल्या काही माणसांच्या आयुष्यातच पृथ्वीतलावर भीषण समस्या निर्माण होईल.

नटवर्यांचा सत्कार

मुंबई - माझ्याकडे शिक्षण घेण्याच्या इच्छेने कोणी नट येतील तर त्यांना शिकविण्यास मी तयार आहे, असे नटवर्य नानासाहेब फाटक यांनी आज दादर शिवाजी मंदिर येथे सत्काराला उत्तर देताना सांगितले. त्यांच्या वयाला सत्तर वर्षे झाली, यानिमित्त केशवराव दाते यांच्या अध्यक्षतेखाली हा सत्कार करण्यात आला.