‘गीर’ गाईस पारितोषिक

पुणे - १९६५-६६मध्ये केंद्रीय गोसंवर्धन मंडळातर्फे घेण्यात आलेल्या अ. भा. दुग्धोत्पादन स्पर्धेत कांदिवलीच्या पशुपैदास केंद्राला तेथील ‘गीर’ जातीच्या गाईने एका वेळेस २४ किलो दूध दिल्याबद्दल २००० रुपयांचे पहिले बक्षीस मिळाले. मुंबईच्या पांजरपोळ संस्थेस १ हजारांचे दुसरे व नाशकाच्या पंचवटी पांजरपोळ संस्थेस पाचशेचे तिसरे बक्षिस मिळाले. या स्पर्धेत आंध्र, उत्तर प्रदेश, बिहार, केरळ, गुजरात, पंजाब, महाराष्ट्र या राज्यांनी भाग घेतला होता.

मिहीर सेनकडून पनामा पार

पनामा - भारतीय जलतरणपटू मिहीर सेन याने पनामा कालवा पोहून जाण्याचा विक्रम आज भारतीय वेळेप्रमाणे रात्री ९.५०ला पुरा केला. पनामा कालव्याच्या पूर्वेकडील टोकाशी अॅटलांटिक महासागरात उतरून त्याने हा प्रयत्न सुरू केला व जवळजवळ ४१-४२ मैल सतत पोहून ३५ तास ३० मिनिटांनंतर कालव्याच्या पश्चिम टोकाशी, पॅसिफिक महासागरात प्रवेश केला. पोटात कळा येऊ लागल्यामुळे त्यांना पहिला प्रयत्न सोडून द्यावा लागला होता. थोड्या विश्रांतीनंतर त्यानी पुन्हा प्रयत्न सुरू केला आहे. त्याने पाण्यात उडी घेतली तेव्हा हवा ढगाळ होती. वाऱ्याच्या झुळकी मधूनमधून येत होत्या. तरी पण एकंदरीने हवा उबदार होती.

आंध्रमध्ये प्रक्षुब्ध निदर्शने

विजयवाडा - येथील पोलिस ठाण्यावर आज दुपारी हल्ला चढविणाऱ्या प्रक्षुब्ध जमावावर पोलिसांनी केलेल्या गोळीबारात ३ माणसे ठार व १७ जखमी झाली. गुंतूर येथील गोळीबारात दोघांना इजा झाली. त्यापैकी एक अत्यवस्थ असल्याचे कळते. विशाखापट्टण येथे पोलाद कारखाना स्थापण्याच्या मागणीसाठी विद्यार्थ्यांनी सकाळी काढलेल्या शांततापूर्ण मिरवणुकीचे दुपारी हिंसक निदर्शनात रूपांतर झाले. केंद्रीय वाहतूकमंत्री एन. संजीव रेड्डी यांच्या ब्राँझच्या पुतळ्यावर विद्यार्थ्यांचा रोख होता. त्यांनी या पुतळ्याला रंग फासला व त्याचे तुकडे करून ते कालव्यात फेकून दिले.

बंदचे लोण शाळेत

मुंबई - महाराष्ट्र राज्यातील प्राथमिक शिक्षकांनी ५ डिसेंबर हा असंतोष दिन म्हणून पाळावा, असा आदेश महाराष्ट्र राज्य प्राथमिक शिक्षक संघाच्या कार्यकारिणीने दिला आहे. या दिवशी आपला असंतोष प्रकट करण्यासाठी सर्व शिक्षक काळ्या फिती लावून शाळेत जातील पण खडू-फळा बंद ठेवून बसून राहतील; शिकविण्याचे वा अन्य कोणतेही काम करणार नाहीत.

(१ नोव्हेंबर १९६६च्या अंकातून)