मटा ५० वर्षापूर्वी

बादशहा खान यांचे उपोषण

नवी दिल्ली - भारतातील हिंसाचार जाती-जमातीतील विद्वेष व जातीयतेला असलेला तीव्र विखार याबद्दल निषेध व्यक्त करण्यासाठी खान अब्दुल गफारखान उद्या सकाळपासून तीन दिवसांचे उपोषण करत आहेत. आज सायंकाळी रामलीला मैदानावर भरलेली सर्वपक्षीय गांधी स्मारक सभा विसर्जित होत असतानाच सरहद्द गांधीनी ही घोषणा केली व उपस्थितांना हादरा दिला.

सरहद्द गांधींचा दौरा

मुंबई - सरहद्द गांधी म्हणजेच खान अब्दुल गफार खान यांचा महाराष्ट्रात दहा दिवसांचा दौरा आखण्यात येत असून महाराष्ट्राच्या ग्रामीण भागात ते आठ दिवस प्रवास करणार असल्याचे कळते. मुंबईमध्ये श्री. खान अब्दुल गफार खान यांचा दोन-तीन दिवसांचा कार्यक्रम आहे. उरलेल्या आठ दिवसांत ते बारा जिल्ह्यांत जातील.

आदर्श गांधीवादी

मुंबई - आदर्श गांधीवादी कसा असतो, याचे सरहद्द गांधी म्हणजे उत्तम उदाहरण. विमानातून उतरले ते खादीच्या पांढऱ्याशुभ्र कापडात बांधलेले बोचके घेऊन आणि पुढच्या दिल्लीच्या प्रवासासाठी विमानात पुन्हा चढले, तेही तेच बोचके हातात घेऊन. अनेकांनी हे बोचके घ्यावयाची तयारी दर्शवली पण त्यांनी नकार दिला. त्यात काय आहे असे एका पत्रकाराने विचारताच, 'यात काय असणार? कपडे!' असे ते म्हणाले. यावर एकाने 'एवढेच?' असे विचारताच ते म्हणाले, 'रात को धोएंगे, सुबह पेहनेंगे.'

गांधींमुळे स्त्रिया आंदोलनात

मुंबई - शास्त्रपुराणात अमंगल ठरविलेल्या स्त्रीला गांधीजींनी राष्ट्रीय आंदोलनात आणले. स्त्रीला सामाजिक क्षेत्रात प्रतिष्ठित केल्याने आज एक स्त्री भारताची पंतप्रधान बनू शकते. याचे श्रेय गांधीजींना जाते, असे उद्गार प्रजा समाजवादी पक्षाचे नानासाहेब गोरे यांनी 'गांधी विचार सत्य दर्शन' व्याख्यानमालेचे 'अमर हिंद मंडळा'त उद्घाटन करताना काढले. अध्यक्षस्थानी प्रा. मे. पुं. रेगे होते.

(३ ऑक्टोबर, १९६९च्या अंकातून)