मटा ५० वर्षापूर्वी

सरहद्द गांधींचे उपोषण

नवी दिल्ली - वाढलेल्या द्वेषाच्या विरुद्ध सरहद्द गांधी खान अब्दुल गफार खान यांनी आज सकाळी सातपासून जातीय एकोप्यासाठी तीन दिवसांचे उपोषण सुरू केले. उपोषणाला बसण्यापूर्वी त्यांनी आपला नित्याचा नमाज पडला. या उपोषणाचा ताज्या जातीय दंगलीशी काहीही संबंध नाही, असे स्पष्ट करून ते म्हणाले की गांधीजींच्या या देशात जो हिंसाचार वाढला आहे त्याविरुद्ध माझे हे उपोषण आहे.

संजय गांधी यांची मोटार

नवी दिल्ली- पंतप्रधान इंदिरा गांधी यांचे बावीस वर्षांचे चिरंजीव संजय यांनी स्वदेशी सुट्या भागांनी बनविलेली छोटी मोटार आज फेरफटक्यासाठी प्रथमच सार्वजनिक रस्त्यावर आणली. उद्योग खात्याच्या तांत्रिक विकास विभागातील काही अधिकाऱ्यांना श्री. गांधी यांनी आपल्या छोट्या मोटारीतून फेरफटका घडविला. या मोटारीत पुढे दोन व पाठीमागे तीन अशी पाच माणसे बसू शकतात. 'त्यामुळे दो या तीन बच्चे, घर मे होते अच्छे' ह्या गोष्टीसाठी तिची रचना सुसंगत आहे. भविष्यातील छोट्या कुटुंबांना ती सोयीची वाटेल. करासह या मोटारीची किंमत दहा हजार रुपये होईल, असे श्री. गांधी म्हणाले. ही गाडी, एक लोहार, एक वेल्डर, एक पॅनल बीटर आणि एक मदतनीस या चौघांच्या साह्याने आपण घरीच बनवल्याचे त्यांनी सांगितले.

न्यूझीलंड ५ बाद २५२

नागपूर - भारतीय क्षेत्ररक्षकांनी आज पुन्हा एकदा गलथानपणाचे प्रदर्शन १२ हजार प्रेक्षकांना दाखविले व दुसऱ्या कसोटीच्या पहिल्या दिवशी न्यूझीलंडला ५ बाद २५२ धावसंख्या रचता आली.

...तर राजीनामा

हुबळी -पक्षातील बेशिस्त समूळ नष्ट करता आली नाही तर मी काँग्रेसच्या अध्यक्षपदाचा राजीनामा देईन, असे एस. निजलिंगप्पा म्हणाले.

(४ ऑक्टोबर, १९६९च्या अंकातून)