१० मे १९६८
गोमांसावर खडाजंगी
नवी दिल्लीः केंद्रीय अन्न व शेतीमंत्री जगजीवनराम यानी आज लोकसभेत प्रश्नोत्तराच्या तासाला गोमांस भक्षणासंबंधी वेदकालीन चालीरीतींबद्दल उल्लेख करताच जो प्रक्षोभ उडाला तो चांगला चाळीस मिनिटे टिकला. संतप्त झालेले जनसंघीय सदस्य म्हणाले त्या काळात गोमांस भक्षणाची प्रथा नव्हती. असले वादग्रस्त विधान केल्याबद्दल त्यांनी मंत्र्यांची खरमरीत हजेरी घेतली. श्री. जगजीवनराम यांनी तेवढ्याच हिरीरीने आपली बाजू मांडली. ते म्हणाले, या विषयावर मी आपले मत दिलेले नाही.
शांतता वाटाघाटी
पॅरिसः अमेरिका आणि उत्तर व्हिएतनामी शिष्टमंडळाची पहिली बैठक उद्या दुपारी येथील आंतरराष्ट्रीय परिषद केंद्रात भरेल, असे मुत्सद्यांच्या माहितगार गोटातून आज सांगण्यात आले. अमेरिका व उत्तर व्हिएतनामी शिष्टमंडळांचे नेतृत्व अनुक्रमे अॅहरेल हॅरिमन आणि झुआन थुई यांच्याकडे आहे. उत्तर व्हिएतनामी शिष्टमंडळाचे प्रमुख आपल्या बऱ्याचशा सहकारी प्रतिनिधीसमवेत आज मॉस्कोमार्गे येथे पोहोचले.
इंग्रजीची गरज
परभणीः इंग्रजी भाषा वैकल्पिक असली तरी ग्रामीण भागात ती शिकविण्याची सोय हवी व या वैकल्पिक भाषेमध्येही विद्यार्थी उत्तीर्ण होणे आवश्यक ठरवावे, असे मत येथे झालेल्या मुख्याध्यापक अध्यापक यांच्या बैठकीत व्यक्त करण्यात आले. बैठकीस जिल्ह्यातून सुमारे ३०० प्रतिनिधी आले होते.
अमेरिकन तळ
नवी दिल्लीः पेशावर येथील अमेरिकन संदेशवहन तळाचा भारताविरुद्ध हेरगिरी करण्यासाठी उपयोग करण्यात येत असल्याच्या वृत्ताबद्दल लोकसभा सदस्यांत आज कमालीचा प्रक्षोभ दिसून आला. भारताच्या सुरक्षिततेला धोकादायक असलेल्या या तळाविरुद्ध अमेरिका व पाकिस्तान यांच्याकडे निषेध न नोंदवल्याबद्दल काँग्रेसच्या व विरोधी खासदारांनी सरकारला धारेवर धरले.
लोकपाल लोकसभेत
नवी दिल्लीः गृहखात्याचे राज्यमंत्री विद्याचरण शुक्ल यांनी आज लोकसभेत लोकपाल व लोकआयुक्त ही कायदेशीर यंत्रणा निर्माण करणारे विधेयक सादर केले. मंत्र्यांनासुद्धा सर्व केंद्रीय सरकारी नोकरांबाबत आलेल्या तक्रारींची चौकशी ही यंत्रणा करणार आहे.