निजलिंगप्पा यांची हकालपट्टी
नवी दिल्ली - आज सकाळी येथील विठ्ठलभाई पटेल भवनात सुरू झालेल्या काँग्रेस महासमितीच्या अधिवेशनात निजलिंगप्पा यांना काँग्रेस अध्यक्ष पदावरून काढून टाकण्यात आले व नंतर सुब्रमण्यम यांची काँग्रेसचे हंगामी अध्यक्ष म्हणून निवड करण्यात आली. महासमितीच्या सदस्यांपैकी ४४५ सदस्य उपस्थित होते व ९४ नियुक्त सदस्यांपैकी ५४ हजर होते. म्हणजे एकूण ४९९ सदस्य अधिवेशनात सहभागी झाले. दरम्यान, इंदिरा गटाच्या काँग्रेस महासमितीने घेतलेला निर्णय अत्यंत दुर्दैवी आहे, अशी प्रतिक्रिया काँग्रेसचे अध्यक्ष निजलिंगप्पा यांनी पत्रकारांजवळ व्यक्त केली.
दारे उघडी
नवी दिल्ली - कार्यक्रम धोरणे व तत्त्वज्ञान मंजूर असलेल्या कोणत्याही व्यक्तीला आमच्या पक्षाची दारे खुली आहेत, असे पंतप्रधान इंदिरा गांधी यांनी आज मागणीनुसार करण्यात आलेल्या अखिल भारतीय काँग्रेस समितीच्या बैठकीत सांगितले. त्या म्हणाल्या की आपली कवाडे बंद करू नयेत आणि मने होरपळून टाकणारे शब्द कोणीही वापरू नयेत.
सरकारी समिती बैठक
नवी दिल्ली - आज महासमितीची जी बैठक झाली ती संघटनेच्या महासमितीची नसून सरकारी महासमितीचे होती, असे मत श्री. कामराज यांनी व्यक्त केले. ते म्हणाले जे प्रतिनिधी उपस्थित होते त्यात सुमारे १०० केंद्रीय व राज्याच्या मंत्र्यांचा आणि पंतप्रधान घाटातील ४५ खासदारांचा समावेश होता.
पुढील अध्यक्ष बळीराम भगत
नवी दिल्ली - काँग्रेसचे हंगामी अध्यक्ष सुब्रमण्यम यांनी अध्यक्षपदी राहण्यास नकार दिला तर परदेशी व्यापार खात्याचे मंत्री बळीराम भगत यांची पुढील काँग्रेस अध्यक्षपदासाठी निवड होण्याची शक्यता आहे. श्रीमती गांधी व त्यांचे प्रमुख सल्लागार यांच्यात झालेल्या बोलण्यावरून हा अंदाज केला जात आहे.
चंद्र सफर
लॉस एंजेलिस
१९८५ सालापर्यंत प्रवाशांना चंद्रावर जाता येईल, असा अंदाज अपोलो अंतराळ यान योजनेच्या शास्त्रज्ञांनी काल येथे व्यक्त केला. ज्या नोर्थ अमेरिकन रॉकवेल कॉर्पोरेशनने अपोलो यान बांधले आहे त्याचे डॉक्टर क्राफ्ट म्हणाले की विविध प्रकारची अंतराळयाने, अंतराळ स्थानके यांचे आराखडे सध्या तयार केले जात आहेत. १९७९ पर्यंत ही बहुधा अस्तित्वात येतील.