म.टा. ५० वर्षांपूर्वी -संप टाळण्याचे प्रयत्न

(१० मे १९६९च्या अंकातून)

.....................
संप टाळण्याचे प्रयत्न

मुंबई - मेच्या मध्यरात्रीपासून सुरू होणार असलेला एस. टी. कर्मचाऱ्यांचा संकल्पित संप टाळण्याचे प्रयत्न सुरू आहेत. त्यासाठी एस. टी. महामंडळावरील बिनसरकारी सदस्यांनी संप टाळण्यासाठी नव्याने प्रयत्न सुरू केले आहेत. काल मध्यरात्री वाटाघाटी फिस्कटल्यावर विधानसभेतील विरोधी पक्षनेते व एस. टी. महामंडळाचे एक सदस्य कृष्णराव धुळुप यांनी आज सकाळी कर्मचाऱ्यांच्या दोन प्रमुख युनियन्सच्या नेत्यांशी ते आपल्या मागण्या किती खाली आणायला तयार आहेत अशी विचारणा केली.

लानाचे सातवे लग्न

ला वेगास (नेवाडा) - सुप्रसिद्ध अभिनेत्री लाना टर्नर हिचा आज येथे जादूगार रोनाल्ड डांटे याच्याशी विवाह पार पडला. तिचा हा सातवा पती होय. या दोघांचेही वय ४९च आहे हे विशेष होय. हा समारंभ एका धर्ममंदिरात पहाटे दोन वाजता पार पडला. लाना टर्नरची स्नेहमंडळी म्हणाली की लॉस एन्जलिस येथे 'कँडी स्टोअर' नामक नाईट क्लबमध्ये त्या दोघांची गाठ पडली.

तनखाबंदीस नकार

नवी दिल्ली -माजी संस्थानिकांचे तनखे व खास हक्क २ ऑक्टोबरपर्यंत रद्द करावेत अशा आशयाच्या लोकसभेत मांडल्या गेलेल्या ठरावाला सक्त विरोध दर्शविणारे निवेदन आज ४५ काँग्रेस खासदारांच्या सह्यानिशी पंतप्रधानांना सादर करण्यात आले. संयुक्त समाजवादी पक्षाचे खासदार रवि रे यांनी हा ठराव आज मांडला व त्यावर अपुरी चर्चा झाली.

पोलिसांत २ पाकिस्तानी

नवी दिल्ली - भारतात निरनिराळ्या राज्यांत एक हजार २३० पाकिस्तानी नागरिक नोकऱ्या करीत असून त्यातील दोघे उत्तर प्रदेश पोलिस दलात कॉन्स्टेबल आहेत, अशी लेखी माहिती गृहखात्याचे राज्यमंत्री विद्याचरण शुक्ला यांनी आज लोकसभेत प्रश्नोत्तराच्या तासात सांगितली. महाराष्ट्रात २७९ पाक कर्मचारी आहेत, असेही ते म्हणाले.