चैत्रोत्सवात भाविकांचा उतरविणार विमा

म. टा. वृत्तसेवा,कळवण

श्री सप्तशृंग गडावर १५ ते २२ एप्रिल या कालावधीत चैत्रोत्सव साजरा होत आहे. त्यादृष्टीने प्रशासन, देवस्थान ट्रस्ट, गड ग्रामपंचायत तयारीला लागले आहेत. चैत्रोत्सवात गडावर येणाऱ्या भाविकांच्या जीविताच्या सुरक्षेचा विचार करता ट्रस्टच्यावतीने दोन कोटीचा विमा उरविला जाणार आहे. कळवण प्रांताधिकारी डी. गंगाथरण यांच्या अध्यक्षतेखाली झालेल्या आढावा बैठकीत हा निर्णय घेण्यात आला.

दरवर्षाप्रमाणे श्री सप्तशृंग निवासिनी देवी ट्रस्ट, सप्तशृंग गड यांच्यावतीने भाविकांसाठी सुविधा उपलब्ध करण्यात येणार आहेत. संपूर्ण सप्तशृंग गड परिसराच्या स्वच्छतेसाठी न्यासच्यावतीने खासगी ठेकेदाराला ठेका देण्यात आला आहे. ५० स्वच्छता कर्मचारी संपूर्ण गावात स्वच्छता ठेवण्याच्या दृष्टीने यात्राकालावधीत कार्यरत असतील.

यात्रा कालावाधीत भाविकांची सुरक्षा व जीविताच्या रक्षणाच्यादृष्टीने ट्रस्टने दोन कोटी रकमेचा जनसुरक्षा विमा उतरविला आहे. या विम्यात सर्व प्रकारचे अपघात, नैसर्गिक आपत्ती, चेंगराचेंगरी व दहशतवादी हल्ला या आपत्ती प्रसंगी होणारा मृत्यू व जखमींच्या कौटुंबिक व जीवित सुरक्षिततेसाठी दोन कोटींचा विमा उतरविण्यात आला आहे. नांदुरी ते सप्तशृंग गड, साडेतीन हजार पायऱ्या, नांदुरी ते सप्तशृंग गड घाट रस्ता, चंडिकापूर ते गड ६० पायऱ्यांचा रडतोंडी घाट यासह गडाचा सर्व परिसर गृहीत धरला आहे.

या बैठकीस तहसीलदार अनिल पुरे, उपविभागीय पोलिस अधिकारी अग्रवाल, पोलिस निरीक्षक मधुकर गावित, सार्वजनिक बांधकाम विभागाचे अभियंता केदार, वीज वितरणचे कार्यकारी अभियंता किरण जाधव, आदी उपस्थित होते.