श्रीकृष्ण जन्माष्टमीचा उत्सव देशभरात मोठ्या उत्साहात आणि भक्तिमय वातावरणात साजरा करण्यात आला. परंपरेप्रमाणे देशातील अनेकविध ठिकाणी जन्माष्टमी पूजन करण्यात आले. मथुरा, वृंदावन, ब्रज, गोळुळ, बरसाना, द्वारका येथे मध्यरात्री कृष्णजन्माचे पूजन, आरती, भजन करण्यात आले. मात्र, सध्याच्या करोना संकटामुळे देशातील बहुतांश मंदिरात भाविकांना प्रवेश देण्यात आला नाही. केवळ पूजाविधींसाठी मंदिरे खुली करण्यात आली. अनेक मंदिरांनी भाविकांसाठी व्हर्चुअल दर्शनाची सुविधा उपलब्ध केली आहे. मंदिरात जाऊन कृष्णदर्शन घेता आले नाही, तरी जन्माष्टमीचा उत्साह तेवढाच होता. पाहूया या जन्मोत्सवाची काही खास क्षणचित्रे.
दिल्लीजवळील नोएडा येथे असलेल्या इस्कॉनच्या राधा कृष्ण मंदिरात मोठ्या उत्साहात कृष्णजन्मोत्सव साजरा करण्यात आला.
उत्तर प्रदेशमधील मुरादाबाद येथे असलेल्या राधा कृष्ण मंदिरात जन्मोत्सव पारंपरिक पद्धतीने मंगलमय वातारवणात पार पडला.
उत्तर प्रदेशातील मेरठमध्ये असलेल्या राधा कृष्ण मंदिरात मध्यरात्री कृष्ण जन्माष्टमीची विधीवत पूजा करण्यात आली. मात्र, हे मंदिर भाविकांना दर्शनासाठी खुले करण्यात आले नाही.
मथुरेतही प्रतिवर्षीप्रमाणे यंदाही मोठ्या उत्साहात आणि भक्तिमय वातावरणात श्रीकृष्ण जन्मोत्सव साजरा करण्यात आला. येथील इस्कॉन मंदिरात मध्यरात्री बाळकृष्णाचे विधिवत पूजन करण्यात आले.
मुंबईतील जुहू भागात असणाऱ्या प्रसिद्ध इस्कॉन मंदिरात कृष्ण जन्मोत्सव साजरा करण्यात आला. मात्र, करोनाचे संकट पाहता या मंदिराने भाविकांना व्हर्चुल दर्शन सुविधा उपलब्ध करून दिली आहे. मंदिर भाविकांना दर्शनासाठी खुले करण्यात आलेले नाही.
पश्चिम बंगालची राजधानी असलेल्या कोलकातामधील झुलन मंदिरात मोठ्या उत्साहात श्रीकृष्ण जन्मोत्सव साजरा करण्यात आला. भाविकांना या मंदिरात जाऊन आराध्याचे दर्शन घेतले. पूजा, अर्चा, आरती, भजन अशा भक्तिमय आणि मंगलमय वातावरणात भाविकांनी जन्माष्टमी उत्सव साजरा केला.
नंदगाव येथेही श्रीकृष्ण जन्मोत्सव मोठ्या थाटात साजरा करण्यात आला. येथे घरोघरी श्रीकृष्ण जन्माष्टमीची पूजा करण्यात आली.