आपल्या लाडक्या स्टार्सविषयी जाणून घेण्यासाठी चाहते नेहमीच उत्सुक असतात. ते कुठे राहतात, त्यांच्या आवडीनिवडी काय आहेत याविषयी त्यांना जास्तीत जास्त माहिती त्यांना हवी असते. कलाकारांबद्दल जाणून घेताना त्यांच्या काही विचित्र सवयींविषयी तुम्हाला नक्कीच माहीत नसेल. त्या आज आम्ही तुम्हाला सांगणार आहोत. हे वाचल्यावर तुमच्याही भुवया उंचावतील हे नक्की
बिग बी अमिताभ बच्चन यांचा बॉलिवूडमध्ये आजही दरारा कायम आहे. आजही ते तरूण नायकांना लाजवेल अशा उत्साहात काम करताना दिसतात. मात्र अमिताभ बच्चन यांना एक विचित्र सवय आहे. जेव्हा ते त्यांच्या कुटुंबियांपासून दूर दुसऱ्या देशात जातात अथवा त्यांच्या कुटुंबियांपैकी एखादी व्यक्ती कामानिमित्त परदेशी जाते. तेव्हा ते चक्क दोन घड्याळे वापरतात. ज्यामुळे त्यांना दुसऱ्या देशात सुरू असलेली वेळ समजणं सोपं जातं.
बॉलिवूडचा किंग शाहरुख खानदेखील विचित्र सवयी असण्यात मागे नाही. लहान मुलांप्रमाणे शाहरुखला व्हिडीओ गेम्स खूप आवडतात. व्हिएफएक्स ग्राफिक्सदेखील त्याच्या आवडीचा विषय आहे. त्याला निरनिराळे व्हिडीओ गेम आणि गेमिंग गॅझेट गोळा करण्याचा छंद आहे. त्यामुळे कामातून वेळ काढून बॉलिवूडचा हा बादशाह त्याचे हे छंद पूर्ण करत असतो.
लाखो तरुणांच्या हृदयाची धडकन असणाऱ्या सनी लिओनीच्या अदांचे चाहते जगभरात आहेत. सनीलादेखील एक विचित्र सवय आहे. सनीला सतत तिचे पाय धुण्याची सवय आहे. ज्यामुळे थोड्या थोड्या वेळानं ती तिचे पाय धुत राहते.
आपल्या दमदार अभिनय कौशल्यानं सर्वांचं लक्ष वेधून घेणाऱ्या विद्या बालनला बहुतांश वेळा तुम्ही साडी नेसलेलं पाहिलं असेल. तिचे सोशल मीडियावर असलेले बहुतांश फोटो हे साडीतलेच आहेत. तिला साड्यांची प्रचंड आवड आहे. इतकी की तिच्याकडे आठशेहून अधिक साड्यांचं कलेक्शन आहे असं बोललं जातं. वेगवेगळ्या प्रकारचे आणि प्रांतातील साड्या गोळा करण्याची सवय विद्याला आहे.
तरुणांच्या गळ्यातील ताईत असलेल्या शाहीद कपूरला कॉफी प्रचंड प्रिय आहे. त्याला कॉफी इतकी आवडते, की त्याचं जणू त्याला व्यसनच लागलंय. दिवसातून तो दहा कप कॉफी पितो असं बोललं जातं.
बॉलिवूडचा भाईजान सलमान खानला एक अतिशय विचित्र सवय आहे. सलमान खानला फक्त नैसर्गिक आणि घरगुती साबण वापरायला आवडतात. त्यामुळे मोठ मोठ्या ब्रँडची जाहिरात करणारा हा तुमचा आवडता स्टार स्वतःसाठी मात्र घरगुती आणि नैसर्गिक पद्धतीने बनवलेले साबणच वापरतो. ते गोळा करत असतो. त्याच्याकडे अशा साबणांचं मोठं कलेक्शन आहे.