सौंदर्याच्या पारंपरिक निकषांना छेद देत बॉलिवूडमध्ये स्वतःच वेगळं स्थान निर्माण करणारी अभिनेत्री म्हणजे भूमी पेडणेकर. 'दम लगाके हाइशा', 'शुभ मंगल सावधान', 'टॉयलेट- एक प्रेमकथा' यांसारख्या दर्जेदार चित्रपटांत मध्यवर्ती भूमिका साकारणाऱ्या भूमीचा आज वाढदिवस! पाहूया, तिच्याबद्दलच्या काही खास गोष्टी...
'दम लगाके हाइशा' या चित्रपटातून भूमीने बॉलिवूडमध्ये पदार्पण केलं. या चित्रपटासाठी भूमीने जवळपास २५ किलो वजन वाढवलं होतं.
अभिनयाआधी भूमीने पडद्यामागे कास्टिंग डायरेक्टरची मदतनीस म्हणून काम केलं. यशराज फिल्म्सचे कास्टिंग डायरेक्टर शानू यांच्या हाताखाली ती काम करायची.
चित्रपटाच्या भूमिकेसाठी ऑडिशन्स चालू होत्या. नवीन कलाकारांना भूमी अभिनयाच्या टिप्स देत होती आणि तिथेच भूमीचा अभिनय नजरेत भरला. भूमीचं अभिनय कौशल्य पाहून तिला थेट 'दम लगाके हाइशा' चित्रपटातल्या मध्यवर्ती भूमिकेसाठी संधी देण्यात आली.
'दम लगाके हाइशा' आणि 'टॉयलेट- एक प्रेम कथा' या दोन चित्रपटांनी भूमीला प्रसिद्धीच्या झोतात आणले. 'सर्वोत्कृष्ट पदार्पण' या कॅटगरीत तिने फिल्मफेअर पुरस्कार पटकावला.
बाबा महाराष्ट्रीयन तर आई हरियाणाची असल्याने भूमी खूप वेगळ्या वातावरणात वाढली. तिचा जन्म आणि बालपण मुंबईतलं. ती जुहूच्या आर्य विद्या मंदीर या शाळेत शिकली.
भूमीने अत्यंत निवडक भूमिका साकारल्या आहेत. समाजात काहीतरी वेगळा विचार रूजवणाऱ्या चित्रपटातच भूमी काम करताना दिसते. आव्हानात्मक भूमिका करण्याकडे तिचा कल असतो.