सुशांतसिंह राजपूतच्या मृत्यूच्या प्रकरणात ड्रग्ज रॅकेटचा संशय बळावत आहे. रिया चक्रवर्ती आणि मिरांडाच्या व्हॉट्सअॅप चॅटवरुन दोघांमध्ये अमली पदार्थ घेण्यात येण्याची चर्चा झाल्याचं स्पष्ट झालं. यानंतर नारकोटिक्स कंट्रोल ब्युरोने या प्रकरणाची करण्याचं ठरवलं. दरम्यान, बॉलिवूड आणि ड्रग्ज एकत्र येण्याची ही पहिली वेळ नाही. यापूर्वी इण्डस्ट्रीचे अनेक सेलिब्रिटींचं नाव यात गुंतवण्यात आलं आहे. अशाच काही सेलिब्रिटींबद्दल आज आम्ही तुम्हाला सांगणार आहोत.
संजय दत्तचं नाव अमली पदार्थांसाठी कुप्रसिद्ध आहे. शाळेत असतानाच त्याने अमली पदार्थांचं सेवन करायला सुरुवात केली होती. १९८१ मध्ये आईच्या मृत्यूनंतर तो अमली पदार्थांच्या अधिक आहारी गेला. वडील सुनील दत्त यांनी संजयला कठीण परिस्थितीतून बाहेर काढले. वडिलांनी संजयला अमेरिकेतील पुनर्वसन केंद्रात खास उपचारासाठी पाठवले होते.
एका मुलाखतीत रणबीरने मान्य केलं होतं की, शाळेत असताना तो अमली पदार्थांच्या आहारी गेला होता. यानंतर त्याला याचीलत लागली. आता त्याने या व्यसनापासून स्वतःला दूर ठेवलं असलं तरी तो आजही चेन स्मोकर आहे.
फरदीन खानला ५ मे २००१ रोजी कोकेन बाळगल्याप्रकरणी अटक करण्यात आली होती. तो पाच दिवस तुरूंगातही होता. नंतर त्याची जामिनावर सुटका झाली. यानंतर फरदीनला तुरुंगातून थेट पुनर्वसन केंद्रात पाठवण्यात आले होते.
९० च्या दशकातली मॉडेल गितांजली बॉलिवूड अभिनेत्री सुष्मिता सेनसोबत कॅटवॉक करताना दिसली होती. मात्र ती अमली पदार्थांच्या इतक्या आहारी गेली की ते मिळवण्यासाठी तिने घरकाम म्हणूनही काम केलं. आयुष्याच्या शेवटच्या दिवसांत ती दिल्लीच्या रस्त्यांवर भीक मागताना दिसली.
'रन', 'बॉम्बे टू गोवा', 'वेलकम', धमाल यांसारख्या चित्रपटांमध्ये आपल्या विनोदांनी लोकांना हसवणारा अभिनेता विजय राज यालाही ड्रग्जच्या प्रकरणात अटक करण्यात आली होती. त्याला २००५ मध्ये दुबईमध्ये ड्रग्ज बाळगल्याच्या आरोपाखाली अटक करण्यात आले होते. नंतर त्याची जामिनावर सुटका करण्यात आली.
एकेकाळी रसिकांच्या मनावर अधिराज्य करणारी अभिनेत्री ममता कुलकर्णीचं नाव २ हजार कोटींच्या ड्रग रॅकेट प्रकरणात आले होते. मीडिया रिपोर्टनुसार, जानेवारी २०१६ मध्ये, केनियामधील मोम्बासा येथील हॉटेल ब्लिस येथे अमली पदार्थांच्या तस्करांची बैठक झाली होता. या बैठकीत ममता आणि तिच्या नवऱ्याचे विकी गोस्वामीचे नाव गुंतले गेले होते. मात्र, नंतर ममताने हे आरोप फेटाळून लावले.
आपल्या रॅपसाठी लोकप्रिय असलेल्या यो यो हनी सिंगही ड्रगच्या तावडीत सापडला आहे. त्याला दारू आणि अमली पदार्थांचं एवढं व्यसन लागलं होतं की त्याला ओळखणंही कठीण झालं होतं. एका वर्षासाठी त्याला पुनर्वसन केंद्रात उपचारासाठी पाठवण्यात आले. या व्यसनातून तो बाहेर आला असला तरी याचा परिणाम त्याच्या करिअरवर झाला.
२०१७ मध्ये राज बब्बर आणि स्मिता पाटील यांचा मुलगा प्रतीक बब्बरने अमली पदार्थांच्या आहारी गेल्याचं मान्य केलं होतं. तो पाच वर्षे या व्यसनाचा अधीन होता. प्रतीकने सांगितले होते की, वारंवार फ्लॉप आणि एमी जॅक्सनसोबतच्या ब्रेकअपमुळे तो व्यसनाधीन झाला होता. मात्र, आता तो आतून बाहेर पडला आहे.