बॉलिवूडमध्ये सतत नवनव्या चित्रपटांवर काम सुरू असतं. पण, ऑगस्ट महिना बॉलिवूडसाठी खूप व्यग्र असणार आहे. या महिन्यात अनेक चित्रपटांच्या चित्रीकरणाला सुरुवात होणार आहे. सलमान खानपासून ते नवोदित आयुषमान खुरानापर्यंत अनेक स्टार्स त्यांच्या शूटिंगला मुहूर्त करताहेत.
'इन्शाअल्लाह' सिनेमाच्या निमित्तानं बऱ्याच वर्षांनी पुन्हा एकदा दिग्दर्शक संजय लीला भन्साळी आणि सलमान खान एकत्र काम करणार आहेत. सध्या बीटाऊटमध्ये सर्वाधिक चर्चेत असलेली आलिया भट देखील या सिनेमामध्ये मुख्य भूमिकेत आहे. ऑगस्टच्या शेवटच्या आठवड्यात भन्साळी आणि कलाकार मंडळी अमेरिकेच्या फ्लोरिडा शहरात सिनेमाच्या पहिल्या शेड्युलसाठी रवाना होणार आहे. या सिनेमात सलमान ओरलँडोस्थित बड्या व्यावसायिकाच्या भूमिकेत दिसणार आहे.
'शुभ मंगल सावधान' सिनेमाच्या अभूतपूर्व यशानंतर आयुषमान खुराना या चित्रपटाचा सिक्वेल घेऊन प्रेक्षकांच्या भेटीला येतोय. वैविध्यपूर्ण सिनेमांच्या निवडीमुळे सध्या यशोशिखरावर असलेल्या आयुषमाननं स्वतःचा असा खास प्रेक्षकवर्ग तयार केला आहे. आगामी 'शुभ मंगल ज्यादा सावधान' चित्रपटात तो एक 'गे' व्यक्तिरेखा साकारणार आहे. ऑगस्टच्या उत्तरार्धात सिनेमाच्या चित्रीकरणाला सुरुवात होतेय.
डेव्हीड धवन यांच्या 'कुली नंबर वन' सिनेमाच्या रिमेकमध्ये त्यांचा मुलगा वरूण धवन झळकणार आहे. वरूणबरोबर या चित्रपटात दिसेल सारा अली खान. सिनेमाचं पहिलं शेड्युल बँकॉकमध्ये चित्रित करण्यात येणार असून, दुसरं शेड्यूल गोव्यात होणार आहे. येत्या ऑगस्टमध्ये सिनेमाची टीम बँकॉकला रवाना होणार असल्याचं कळतंय.
आगामी 'बागी ३'मध्ये देखील टायगर श्रॉफ आपल्या अफलातून स्टंट्सच्या कौशल्यानं चाहत्यांना घायाळ करण्यासाठी सज्ज होतोय. यावेळी सिनेमात टायगरबरोबर अभिनेत्री श्रद्धा कपूर दिसेल. अहमद खानच्या दिग्दर्शनाखाली होणाऱ्या 'बागी ३'चं चित्रीकरण परदेशातल्या अनेक ठिकाणांवर होणार आहे. सिनेमात टायगरबरोबर श्रद्धा देखील स्टंट्स करताना दिसणार आहे.
‘मुल्क’, ‘नाम शबाना’, ‘बदला’, ‘गेम ओव्हर’ यासारख्या सिनेमांच्या दमदार यशानंतर तापसी पन्नूनं निवड केलीय ती ‘थप्पड’ या सिनेमाची. सामाजिक आणि राजकीय व्यवस्थेवर भाष्य करणाऱ्या या सिनेमाचं दिग्दर्शन अनुभव सिन्हा करणार असून, हा चित्रपट दिल्लीत चित्रित केला जाणार आहे. ऑगस्टच्या दुसऱ्या-तिसऱ्या आठवड्यात चित्रीकरणाला सुरुवात होईल.
‘द डर्टी पिक्चर’ आणि ‘वन्स अपॉन ए टाइम इन मुंबई' या सिनेमांचे दिग्दर्शक मिलन लुथरिया यांनी त्यांच्या आगामी सिनेमावर काम सुरु केलं आहे. सिनेमात 'स्टुडंट ऑफ द इयर २' फेम तारा सुतारीया आणि सुनील शेट्टीचा मुलगा अहान झळकणार आहेत. हा सिनेमा 'आरएक्स १००' या तेलगू सिनेमाचा रिमेक असून, अद्याप त्याचं नाव निश्चित झालेलं नाही. ऑगस्टच्या मध्यावर सिनेमाच्या चित्रीकरणाला सुरुवात होईल असं बोललं जातंय.
रॉमकॉम 'लुकाछुपी'नंतर क्रिती सॅनन राहुल ढोलकीयाच्या आगामी सिनेमा काम करणार आहे. अद्याप या सिनेमाचं नाव गुलदस्त्यात ठेवण्यात आलं आहे. सिनेमात क्रिती माध्यम क्षेत्रातील व्यक्तिरेखा साकारणार असल्याचं कळतंय. येत्या ऑगस्टमध्येच सिनेमाच्या कामाला सुरुवात होणार आहे.