आज मुंबईतील कुर्ला टर्मिनसच्या रेल्वे क्वार्टर्सच्या मैदानात पावसाच्या पाण्यावर बोटीचा फिल येण्यासाठी तिथल्या मुलांनी तरंगत्या थर्माकोलचा वापर करत मजा केली. हार्बर लाईनवर पाणी साचल्याने मुलांनी पावसामुळे साचलेल्या पाण्यावर थर्माकोल तरंगवत बोटीचा फिल घेतला.
टिळक नगर ते कुर्ला रेल्वे क्वार्टर रोड दरम्यानच्या रेल्वे रूळांमध्ये पाणी साचले आहे. मुंबईत मुसळधार पावसामुळे ऑरेंज अलर्ट देण्यात आला आहे. कुर्ला एलबीएस रोडवर पाणी साचल्याने आज अनेक दुकाने देखील पाण्यात गेली आहेत.
दोन दिवसांच्या मुसळधार पावसाने मुंबईची तुंबई झाल्याचं पाहायला मिळालं. मुंबईसह अनेक उपनगरांमध्ये धुवाधार पाऊस झाला आहे. यामुळे रेल्वे, रस्ते आणि शाळांना याचा मोठा फटका बसला आहे.
हवामान खात्याने दिलेल्या माहितीनुसार, मुंबईत अतिमुसळधार पावसाचा अंदाज आहे. मुंबईसह उपनगरांमध्ये आणि नजीकच्या शहरांमध्ये पुढच्या ३-४ तासांमध्ये मुसळधार ते अतिमुसळधार पावसाची शक्यता वर्तवण्यात आली आहे.
अनेक भागांमध्ये रस्त्यांवर पाणी साचल्याने वाहतूक कोंडी झाल्याचं चित्र आहे. कालपासून सुरू असलेला पाऊस अजूनही थांबण्याचं नाव घेत नाहीये. त्यामुळे मुंबईकरांसाठी पुढचे काही तास धोक्याचे आहेत. असंच म्हणावं लागेल.
महाराष्ट्रात मान्सून सक्रिय झाल्यामुळे मुंबई-ठाण्यालगतच्या जिल्ह्यांमध्ये मुसळधार पाऊस झाला आहे. भारतीय हवामान विभागाने (IMD) मुंबई, ठाणे, पालघर, रायगड, रत्नागिरी, सिंधुदुर्ग, पुणे, बीड, लातूर, जालना, परभणी आणि महाराष्ट्रातील इतर अनेक भागात अतिवृष्टीचा इशारा दिला आहे.
हवामान खात्याकडून देण्यात आलेल्या माहितीनुसार, मुंबईला ९ जुलैपर्यंत ऑरेंज तर दक्षिण कोकणात रेड अलर्ट देण्यात आला आहे.