अहमदनगर जिल्ह्यातील शनि शिंगणापूर हे महाराष्ट्रातील प्रसिद्ध तीर्थक्षेत्र असून आज शनी जयंतीनिमित्त इथे मोठा उत्सव साजरा केला जात आहे.
नेवासा तालुक्यात सोनई गावापासून जवळच शनीचं शिंगणापूर येथे शनीदेव स्वयंभू पाषाण रूपात विराजमान आहेत. येथे श्रीशनैश्वराचे स्वयंभू जागृत देवस्थान असून शनिदेवाची मूर्ती ५ फूट ९ इंच उंचीची आहे.
जवळपास दीडशे वर्षांपूर्वी एका पुरात ही शिळा वाहत गावाजवळ आली. या शिळेला तसा वेगळा आकार नाही. त्या रात्री शनिदेवाने एका गावकऱ्याला दृष्टांत देऊन 'मामा-भाच्यांनी मिळून माझी स्थापना करा', असा दृष्टांत दिला आणि गावकऱ्यांनी ती शिळा उभी करून तिची पूजा करण्यास प्रारंभ केला.
हा देव उघड्यावरच एका चौथऱ्यावर आहे. देव असून देऊळ नाही हे या देवाचं वैशिष्ट्य आहे. शनिदेवास निवारा आवडत नसल्याने या पाषाण शिळेवर कोणताही निवारा नाही.
वर्षप्रतिपदा आणि वर्षातील प्रत्येक महिन्याचे चारही शनिवार इथे यात्रा भरते. शनि अमावास्या आणि गुढीपाडवा या दिवशी येथे मोठी यात्रा असते. शनि जयंतीस वैशाख अमावस्या दिवशी येथे उत्सव साजरा होतो.