शिर्डीच्या साईबाबांना सोन्याची आभुषण दान देण्याचे प्रमाण सातत्याने वाढतच आहे. आंध्रप्रदेशातील बापटला येथील दानशुर साईभक्त अन्नम सतिष प्रभाकर यांनी ७७० ग्रॅम वजनाचा ३६ लाख ९८ हजार ३१० रुपये किंमतीचा सोन्याचा मुकुट आणि ६२० ग्रॅम वजनाचे ३३ हजार ४८० रुपये किंमतीचे चांदीचे ताट साईचरणी अर्पण केले आहे.
कोरोना संकटामुळे साई मंदिर तब्बल दोन वर्षे भाविकांना दर्शनासाठी बंद होते. मात्र ७ ऑक्टोबर २०२१ रोजी साई मंदिर भाविकांसाठी खुले झाले आणि साईभक्तांबरोबरच दानाचा आकडाही वाढत गेला.
रोख स्वरूपातील दानासोबतच साई चरणी सोने-चांदीची आभूषणे दान करण्याकडे भाविकांचा कल वाढलेला दिसून येत आहे. काही महिन्यांपूर्वीच पार्थ रेड्डी यांनी २ कोटी रुपये किमतीचा सोन्याचा महिरप, हैदराबाद येथील मंडा रामकृष्णा यांनी सुमारे ३३ लाख रुपये किमतीचा सुवर्ण मुकुट देणगी स्वरूपात अर्पण केला आहे.
दिल्लीचे ऋषभ लोहिया यांनी नुकतीच सुमारे ४ लाख ८५ हजार ७५७ रुपये किंमत असलेली १०० ग्राम वजनाची सोन्याची बासरी साई चरणी अर्पण केली. तर गुरुवारी ( ११ ऑगस्ट ) रोजी आंध्रप्रदेशातील बापटला येथील दानशुर साईभक्त अन्नम सतिष प्रभाकर यांनी ७७० ग्रॅम वजनाचा ३६ लाख ९८ हजार ३१० रुपये किंमतीचा सोन्याचा मुकुट आणि ६२० ग्रॅम वजनाचे ३३ हजार ४८० रुपये किंमतीचे चांदीचे ताट साईचरणी अर्पण केले आहे.
साई संस्थानकडून देखील साईबाबांचे कार्य अविरतपणे सुरू असून मिळालेल्या दानाचा विनियोग रुग्णसेवा तसेच सामाजिक कार्यासाठी केला जातो. साईबाबांप्रति असलेली श्रद्धा अनेक दानशूर साईभक्त विविध माध्यमातून साईचरणी अर्पण करतात. गेल्या काही महिन्यांपासून दानाचा हा ओघ मोठ्या प्रमाणात वाढल्याचे बघायला मिळत आहे.