किल्ले रायगडावर शिवराज्याभिषेकाचा शाही सोहळा पार पडला. आज तिथीनुसार राज्याभिषेक सोहळा साजरा केला गेला. स्वराज्याच्या राजधानीत शिवभक्तांच्या उपस्थितीत किल्ले रायगड दुमदुमला आहे. अख्ख्या रायगडावर फुलांची सुंदर सजावट करण्यात आल्याचं पाहायला मिळालं. छत्रपती शिवाजी महाराजांच्या पुतळ्यासह संपूर्ण किल्ल्याला आकर्षक सजावट करण्यात आली होती.
यंदाचा शिवराज्याभिषेक सोहळा सरकारकडून साजरा करण्यात येत आहे. मागील दोन महिन्यांपासून आजच्या खास दिवसासाठी तयारी केली जात होती. राज्यभरातून येणाऱ्या शिवभक्तांसाठी गडाच्या पायथ्याशी पार्किंगची व्यवस्था कोंझर, वालुसरे, पाचाड येथे करण्यात आली आहे. गडावर शिवभक्तांसाठी १० हजार लिटर तसंच पायथ्याशी ४० हजार लीटर पाणीसाठा, तसंच ठिकठिराणी दिशादर्शकही लावण्यात आले आहेत.
रायगडावर ३५०व्या शिवराज्याभिषेक सोहळ्याचे साक्षीदार होण्यासाठी अनेक शिवभक्तांची तुफान गर्दी केली होती. रायगडावर छत्रपती शिवाजी महाराजांचा जयघोष घुमला असून भगवे झेंडे, महाराजांच्या जयघोषात आजचा क्षण साजरा केला गेला. आजच्या दिवसाची क्षणचित्र आपल्या मोबाईलमध्ये टिपण्यासाठी प्रत्येक शिवभक्त आतुर होता. १ जून ते ६ जून या कालावधीत हा सोहळा साजरा होत आहे.
मराठी साम्राज्याच्या इतिहासात खास ओळख असलेला रायगड सह्याद्रीच्या पर्वतरांगांमध्ये वसलेला आहे. छत्रपती शिवाजी महाराजांचा शिवराज्याभिषेक याच गडावर झाला होता. तो क्षण केवळ महाराष्ट्रासाठी नाही, तर संपूर्ण भारतासाठी, भारताच्या इतिहासातील एक अविस्मरणीय, लक्षणीय घटना होती. आज त्याला ३५० वर्ष पूर्ण होत असून शिवभक्त हा दिवस उत्साहाने साजरा करत आहेत.
ढोलताशांच्या गजरात रायगड दुमदुमला असून अनेक चिमुकले शिवाजी महाराजांच्या वेषभूशेत रायगडावर उपस्थित होते. तसंच अनेक साहसी खेळांचं सादरीकरण देखील रायगडावर केलं गेलं. पारंपरिक वेषभूशेत अनेक महिला, मुलींनी छत्रपती शिवरायांच्या काळातील साहसी खेळ सादर केले.
सह्याद्रीच्या पर्वतरागांमध्ये असलेल्या रायगडावर मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या हस्ते शिवराज्याभिषेक पार पडला. २ जूनला तिथीनुसार, तर ६ जूनला तारखेनुसार शिवराज्याभिषेक दिन साजरा होणार आहे. आज तिथीनुसार झालेल्या शिवराज्याभिषेकादिनी मुख्यमंत्री एकनाथ शिंदेंनी जनतेला संबोधित केलं.